DILI (timorpost.com) — Organizasaun Sosiedade Sivíl, Asia Justice and Rights (AJAR), preokupa ho Polítika Governu hodi sosa Ró haksolok, tanba laiha benefísiu ba povu Timor-Leste.
Sekretáriu Jerál Asia Justice and Rights (AJAR), Inoséncio de Jesus Xavier, hatete Governu sosa ró haksolok ho orsamentu millaun 14 USD, fó benefísiu saida mai Timor-Leste, signifika gasta osan no fó riku de’it ba Portugál.
“Governu sosa Ro haksolok ne’e ho nia orsamentu millaun 14 USD, foufoun dehan atu sosa Ro, ikus mai mosu polítika muda fali halo investimentu, ne’e ita fó moris Portugal de’it”, nia hateten iha knaar fatin faról, Kuarta (01/02).
Tanba ne’e nia husu Komisaun Anti Korrupsaun (KAK), atu halo investigasaun ba kazu Ro Haksolok, tanba sosa ho osan montante millaun 14 USD, maibé laiha benefísiu ba Timor-Leste.
Nia hatutan, KAK tenke toma atensaun tanba ne’e krime korrupsaun, Governu gasta osan ne’ebé laiha benefísiu ba povu.
Nia hatete, sera ké timoroan balun ba servisu iha Portugal ne’e hetan moris di’ak ka lae? Di’ak liu Governu loke kampu servisu iha rai laran, duke sosa fali Ró fó riku ba nasaun seluk de’it.
Tanba ne’e, nia dehan KAK tenke sériu halo investigasaun, mandatu KAK nian hotu ona la halo buat ida, selu sira maibé la halo servisu lalais para garantia kualidade servisu.
“Ha’u hanoin ida ne’e labele tolera, se de’it mak pratika ida ne’e tenke iha responsabilidade, tanba lei ne’e vale ba ema hotu-hotu”, nia afirma.
Nia dehan, hanesan ida husi Provedoria dos Diretos Humanos e Justiça (PDHJ), katak Lei ne’e hanesan samodok, “so tata ema ain tanan de’it, ema tau sapatu ne’e samodok la tata”, entaun reflete katak, lei kondena ema ki’ik de’it, ema boot sira la kondena.
“Se ema ne’ebé gasta osan Governu nian la lori benefísiu mai Timor, nu’udar sosiedade sivíl ami kondena aktu ne’e, inklui instituisaun ida ne’ebé servisu ba prevensaun kombate korrupsaun mak la halo ida ne’e, sira mós tama iha konspirasaun polítika”, katak nia.
Sosiedade sivíl sei haree no observa aktu hirak ne’e, KAK brani halo investigasaun ka lae, ninia problema husi ne’ebé, sira asegura de’it pozisaun.
Inosénsiu afirma, video hatudu momoos katak, kondisaun Ro nian aat ona, lori Ro ne’e mai bosok povu, la’ós tempu ona atu halo propaganda bosok povu no gasta osan arbiru.
“Ha’u dezafia Prezidente Autoridade RAEOA, Arsénio Paixão Bano, inklui Primeiru Ministru, hatete fulan Augustu 2022 Ro tenke atraka ona iha portu Dili, agora ita tama ona tinan 2023, realidade laiha”, nia kestiona.
Ikus nia dehan, se Ro la mai Prezidente Autoridade Rejiaun Administrativu Espesiál Oe-Kusse Ambenu (RAEOA), Arsénio Bano, sei tama kadeia (Komarka), tenke hatudu ta’uk Governu monu ka asegura de’it pozisaun.
944 total views, 9 views today
