DILI (timorpost.com) – Komunidade Xineza iha Timor-Leste, Domingu (22/01), selebra sira-nia loron tinan foun Xina nian ba dala-4100.
Iha selebrasaun loron bo’ot tinan foun Xina nian ne’e Komunidade Xineza iha Timor-Leste loke ho reza hamutuk ka sambayan iha uma Xina Maromak Bairru Formoza, nu’udar jestu tuir fiar Komunidade Xineza sira nian.
Alende halo atividade reza hodi komemora loron tinan foun Xineza, komunidade Xineza iha Timor-Leste sei halo mós atividade ba vizita Embaixada Xina iha Timor-Leste lori Drogon Dance ka Baronsite hodi ba vizita mós loja sira iha Dili laran no ikus ba vizita Xina Rate Taibesi.
“Ohin loron primeiru ba kalendáriu Xineza ka anu novu Xineza nian ne’ebé selebra ba dala-4100 tuir tradizasaun Xineza nian ami mai halo Sambayan iha Xina Maromak nia fatin atu husu bensaun iha sagradu tuir kustumi no tradisaun Xineza iha mundu tomak,” Prezidente Assosiasaun Komersiál Komuidade Xieneza Timoroan Kathleen Gonçalves ba jornalista sira bainhira remata reza hodi komemora tinan foun iha uma Xina Maromak Bairru Formoza, Domingu (22/01).
Nia dehan, ho tinan foun Xineza ba 2023 Komunidade Xineza iha Timor-Leste hakarak fortifika koopersaun ho Governu Timor-Leste liuliu atu kontribui ba prosesu dezemvolvimentu nasionál.
“Ami kontinua hakarak sai parseiru ba Governu ba entidade iha Timor-Leste, nune’e kontribui ba prosesu dezemvolvimentu iha Timor-Leste,” esplika Kathleen Gonçalves.
Tema ba selasaun tinan foun Xina nian 2023 maka “Ksolok Natal no Tinan foun ba Ita-Hotu”.
Nune’e mós sira hala’o vizita ba edifísiu Embaixadór Xina iha Timor-Leste iha Pantai Kelapa, inklui mós fatin seluk tan.
1,487 total views, 3 views today
