DILI (timorpost.com) – Komité 12 Novembru, Kinta (05/01), hala’o konferénsia imprensa hodi hato’o preokupasaun kona-ba violénsia sira ne’ebé buras iha Timor-Leste.
Portavós Komité 12 Novembru, Joana Almeida, hatete kazu violénsia ne’ebé mosu beibeik hanesan kultura aat ne’ebé prezudika ema nia direitu báziku no implika situasaun ladi’ak iha komunidade nia leet.
“Ami deklara kontra no Kondena hahalok joven ne’ebé halo violénsia hasoru membru komunidade sira, ezemplu, violénsia entre joven sira, hasoru amu lulik sira hanesan, Amu Nelson foin lalais iha Manatutu no kazu uluk hamate Amu Abito iha Dare”, nia hateten iha Balide.
Tanba ne’e nia husu ba autoridade kompetente sira hanesan, Prevedoria Direitu Umanu no Justisa (PDHJ) no Polisia Nasionál Timor-Leste (PNTL), no mós Ministériu Públiku, Tribunal sira ne’ebé fó atendimentu ba kazu violénsia sira atu servisu neutru no profisionál hodi prosesa no fó sansaun todan ba autór sira.
Nia hatutan, autoridade kompetente sira tenke servisu neutru hodi bele fó justisa ba vítima no suspeitu sira, atu nune’e ema labele repete beibeik kultura violénsia ne’ebé moris kleur ona iha povu nia leet.
Nia haktuir, uluk povu ne’e terus, tanba ne’e presiza moris hakmatek no domin iha tempu ukun rasik aan, Governu presiza tau aas justisa iha ema hotu nia leten hodi halo dezenvolvimentu iha aspetu hotu-hotu no labele iha diskriminasaun.
Iha biban ne’e, Prezidente Komité 12 Novembru, Gregório Saldanha, hatete motivu violénsia ne’ebé mosu beibeik hosi joven sira mai hosi fatór oin-oin, balun mentalidade, emosionál, no implika problema servisu laiha.
Nia hatete, violénsia mosu beibeik impaktu mós husi grupu arte-marsiás halo provokasaun hodi halo violénsia beibeik ida ne’e mak ladi’ak iha rai doben ida ne’e.
Nia afirma, iha semana kotuk parte seguransa hanesan FALINTIL Forsa Defeza Timor-Leste (F-FDTL), halo Violénsia hasoru joven ida, situasaun ne’e viral iha media sosiál, tanba ne’e autoridade sira servisu tenke neutralidade.
“Ami-nia apela ba autoridade kompetente sira hanesan, PNTL no F-FDTL tenke servisu neutru no profisionál, ami mós rona informasaun katak, PNTL balun servisu ladún neutrál tendénsia ba grupu arte-marsiais”, tenik nia.
Ikus nia dehan, agora tama ona tinan 2023, presiza hapara hahalok brutalizmu entre joven ho Komunidade nune’e labele mosu tan problema.
1,448 total views, 3 views today
