DILI (timorpost.com) — Iha semana rua, hosi loron 20 Dezembru 2022, to’o 3 Janeiru 2023, mosu dezastre rua, anin boot ho inundasaun iha teritoriu Timor-Leste hodi estraga komunidade nia uma hamutuk 69.
Komandante Operasaun Nasionál, Autoridade Protesaun Sivíl (APS), Superintendente Assistente Polísia, Nuno Romualdo Gomes, informa ida ne’e ba jornalista, liuhosi konferénsia imprensa iha salaun ekontru APS, Kaikoli, Tersa, (03/01).
“Hanesan Komandante Operasionál, Autoridade Protesaun Sivíl hakarak informa ba ita boot sira, liuliu relasaun ba dadus dezastre, hahú hosi dia 20 Dezembru 2022 ate dia 3 Janeiru 2023, estraga komunidade nia uma hamutuk 69, iha Munisípiu balu”, nia hateten.
Nia dehan, hosi tipu dezastre Anin forte hodi estraga komunidade nia uma 36, hosi Munisípiu 10, ne’ebé ho estragu kuantidade uma diferente.
“Anin sobu uma 1 iha Atauro, Baukau Uma 1, Lautem uma 5, Likisá uma 3, Kovalima uma 1, Vikeke uma 1, Ermera uma 1, RAEOA uma 2, Aileu uma 1, Iha Bobonaru maka uma 18”, nia relata.
Enkuantu tipu dezastre seluk fali maka Inundasaun, ne’ebé kuaza estraga komunidade nia uma hamutuk 33, ne’e akontese iha RAEOA.
“Tipu dezastre ida seluk inundasaun, ne’ebé halo kauza ba komunidade nia uma estragu hamutuk 33, ne’e akontese iha RAEOA”, Nuno hateten.
Durante akontesimentu dezastre, APS fó apoiu emerjénsia ba vítima sira hanesan nesesidade bázika ai-han, fasilidade dapur nian, hosi Munisípiu ida-idak fó kedas apoiu emerjénsia.
Nia hatutan, vítima sira ne’e balu sei kontinua utiliza sira-nia uma ne’ebé estragu, maibé sei di’ak hela, vítima balu evakua ba fatin seguru hodi hein ekipa sira tun halo asesmentu ba uma sira ne’e.
1,520 total views, 9 views today
