DILI (timorpost.com) – Atu kombate mal-nutrisaun, Prezidente Repúblika, José Ramos Horta, prevee orsamentu rihun 11 USD, hodi fó han labarik ho inan sira.
Diretór Ezekutivu Klínika Bairru-Pité (KBP), Inácio dos Santos, hatete programa ne’e hetan apoiu orsamentu husi Xefe Estadu ho objetivu atu hasa’e nutrisaun iha rai-laran.
“Agradese ba Prezidente Repúblika, liuhusi unidade nutrisaun ne’ebé suporta ona Klínika Bairru-Pité, ho Postu rua hanesan, Postu Saúde Maloa no Kampung-Alor, hodi hasa’e nutritivu iha rai-laran. Total orasamentu ne’ebé hahú fulan Dezembru nia laran ita iha 11 mill ital, atu bele halo programa ida ne’e”, hateten nia iha klínika Bairru-Pité, Sesta (15/12).
Nia esplika, husi totál orsamentu ne’ebé sei fó han ba benefisiáriu hamutuk 222, sira han loron-loron durante loron 30, espera programa ne’e la’o nafatin, fó benefísiu di’ak ba Inan isin-rua no larabik ho tinan 1-7.
Ho nune’e, liuhusi unidade nutrisaun Palásiu Prezidente Repúblika ho Ministériu Saúde, Klínika Bairru-Pité no mós parseiru dezenvolvimentu tuur hamutuk halo diskusaun durante fulan hirak nia laran, ohin loron realiza programa refere.
“Ida ne’e hanesan pilotu ida, espera katak ba ohin bele kontinua hodi redus mal-nutrisaun iha Timor-laran tomak, hanesan ita hotu hatene kada fulan mal-nutrisaun sa’e makaas”, dehan nia.
Nia informa, kada fulan rejistu Inan isin-rua ne’ebé hetan mal-nutrisaun 15 to’o 17, no labarik kiik oan ho tinan 1-7 kuaze na’in 11 ba leten, hahú Janeiru-Setembru Inan isin-rua hamutuk 171 signifika mal-nutrisaun aas iha Timor-Leste.
Tanba ne’e, bainhira seidauk redus mal-nutrisaun, seidauk ko’alia moras Tuberkulozu (TB) no moras sira seluk, mal-nutrisaun moras ne’ebé fó impaktu ba Saúde.
Nia dehan, maski Parlamentu Nasionál la apoiu, esforsu oinsá bele sustenta klínika Bairru-Pité la’o di’ak, liuliu populasaun rasik.
Iha sorin seluk, reprezenta Prezidente Repúblika liuhosi Adjunta Kasa Sivil, Henriqueta Maria da Silva, hatete maski Governu la apoiu ba programa mal-nutrisaun, maibé Prezidente Repúblika, José Ramos Horta, esforsu hodi apoiu tanba Klínika Bairru-Pité ajuda ema barak ona.
“Ami la’ós haree tanba de’it Governu, maibé ami haree klínika ne’e servisu duni dezde Timor ukun aan, no ajuda ema barak”, dehan nia.
Ho nune’e, presiza duni apoiu atu kombate mal-nutrisaun, ema barak konsulta iha klínika refere, apoiu ne’e hanesan prioridade ida, nune’e tau atensaun ba programa.
1,342 total views, 3 views today
Bele hare Video Seluk :
Subscribe to Timorpost
