DILI (timorpost.com) – Governu liuhusi Sekretáriu Estadu Protesaun Sivíl (SEPS), Joaquim José Gusmão dos Reis Martins, ofisial entre karreta Governu unidade sia ba iha Komandante Autoridade Protesaun Sivíl (APS).
Nia hatete, ohin Protensaun Sivíl marka tan pasu ida ba oin, hodi kompleta Autoridade Munisipal Protesaun Sivíl (APS) nia ekipamentu, liuliu viatura ne’ebé durante ne’e, Autoridade Munisipal sira halerik tebes no presiza tebes hodi halo servisu iha Munisípiu ne’e.
“Objetivu ohin ita apoiu viatura ba Komadante Autoridade Protesaun Sivíl Munisipal, oinsá atu halo atendiementu lalais ba iha ita-nia komunidade sira ne’ebé afetadu ba Dezastre Naturais iha Munisípiu sira”, nia hateten hafoin entrega Karreta iha Kaikoli, Sesta (02/12).
Nia dehan, dala-barak akontese dezastre naturais, maibé menus viaturas, oinsá atu halo atendiementu ho lalais ba komunidade sira ne’ebé afeta dezastre naturais.
“Ita harii ona Autoridade Protesaun Sivíl iha Munisipal sira, tenke responsabilidade Maka’as, liuliu sira hanesan Komandante APS no Segundu Komandante sira hodi bele halo atendimentu ne’ebé lalais ba ita-nia komunidade ne’ebé afeta ba iha dezastre naturais,” nia hateten.
Nia afirma, mezmu veíkulu seidauk kompletu, foin mak iha veíkulu sia mak foin Governu bele entrega ba iha Munisípiu sia, hanesan Munisipiu Dili, Manatuto, Baukau, Vikeke, Lauten, Likisá Ermera, Kovalima ho inklui RAEOA.
“Ita haree Munisípiu hotu-hotu no inklui RAEOA, ita haree iha difikuldade Maka’as atu halo atendimentu ba dezastre naturais, tanba ne’e ita hetan apoiu viatura balun oinsá bele atende ba dezastre naturais iha Munisípiu sira,” nia dehan.
Alende ne’e nia dehan, veíkulu sia ne’e daudaun fahe ba Komandante APS ne’e, uza Orsamentu Jerál Estadu tinan 2022 nian, maibé orsamentu hira, ne’e mak nia parte la lembar ona.
Nia hatutan, sira iha planu tinan oin sei hola tan ba Munisípiu sira ne’ebé seidauk hetan.
Iha biban ne’e, Komandante Autoridade Protesaun Sivíl (APS) Munisípiu Likisá, Manuel Maria do Santos, hatete durante ne’e sira-nia parte hetan difikuldade ba iha veíkulu sira, maibé daudaun ne’e sira hetan ona veíkulu bele hafasil sira-nia servisu ne’ebé sira halerik.
“Ami sente kontente no orgullu tebes, ohin ami Komandante Autoridade Protesaun Sivíl, bele hetan ona veíkulu ida, para oinsá bele ajuda iha ami-nia servisu sira iha Munisípiu, liuliu banhira ita-nia komunidade sira hetan dezastre Naturais, ami bele ba atende lalais,” nia dehan.
Nia hatete, karreta ne’ebé ohin entrega ba sira ne’e, nia parte fiar katak sei uza ho kuidadu, durante iha sira-nia servisu loron-loron iha Munisípiu.
“Karreta ida, maibé bele fasilita ona sira-nia servisu loron-loron nian, uza lai ida ne’e karik iha planu Governu hakarak apoiu tan, di’ak liután,” nia hakotu.
1,260 total views, 3 views today
Bele hare Video Seluk :
Subscribe to Timorpost
