DILI (timorpost.com) – Atu inaugura Portu Tibar iha loron Kuarta (30/11), Polisia Nasionál Timor-Leste (PNTL), liuhusi Komandante Tránzitu Munisípiu Dili, Inspetór Polisia Domingos Sarmento Gama, husu Karreta Kontentór kontinua kumpre despaxu konjunta husi Ministériu Transporte Komunikasaun (MTK) ho Ministériu Interior (MI), kona-ba sirkulasaun karreta pezadu ou kontentór sira-nia oráriu.
“Inaugurasaun ba ita-nia Portu Tibar, monu iha Kuarta (30/11), iha atividade ida ne’e dala-ruma atividade espesiais akontese iha ne’ebá, maibé nafatin kontetores sira ka karreta sira ne’ebé despaxu konjuntu dehan bandu no halo sirkulasaun tuir nia oráriu, se sira viola ita kontinua atua nafatin,” nia hateten iha knaar fatin Komandu Munisípiu Dili, Kaikoli.
Nia dehan, iha atividade inaugurasaun Portu Tibar, se iha pedidu ruma ka iha koñesimentu parte PNTL sei tolera, maibé presizamente eskoltu husi parte tránzitu, atu justifika katak atividade ida ne’ebé la’o ne’e parese iha espesiál ruma, maibé kuandu sira hala’o mak laiha koñesimentu ruma membru sira iha terrenu prende, laiha razaun seluk, tanba de’it serimónia inaugurasaun portu Tibar, ne’ebé sira halo sirkulasaun la presiza husu autoriza ne’e la bele, tránzitu kontinua halo atuasaun.
“Ita nia kontentór sira ne’ebé halo sirkulasaun ne’ebé ami hetan kontinua halo atuasaun no prende transporte no sira kumpre sira-nia devér hafoin bele foti fali transporte,” nia hateten.
Tanba ne’e, komandante Tránzitu Munisípiu Dili, husu ba kompañia sira atu kumpre no halo tuir de’it regra despaxu konjuntu ne’ebé iha.
“Infrasaun mak, se kompañia koko viola, despaxu konjuntu ne’e aplika artigu 10 lei kódigu estrada koimas 75 USD, mais kada kompañia ida mak koko kontinua viola, dehan 75 USD ne’e ho montante ki’ik no kaman ba sira koko viola tan, la taka dalan bele avansa ba artigu 57 no koimas mínimu 600 USD no másimu 3 Mill, nune’e mós iha artigu 57, hatete ba sirkulasaun karreta sira ne’ebé boot liu no todan liu la bele halo sirkulasaun iha estrada públiku,” nia dehan.
Nia hatutan, bainhira sira koko viola mak parte tránzitu implementa koima iha mínimu 600 USD no másimu 3 Mill, maibé sira kontinua koko viola tan, sira bele halo partisipasaun krime ba sira, partisipa krime ba sira no lori sira ba iha Ministériu Públiku no lori ba iha Tribunal halo julgamentu, hafoin mak bele deside.
Alende ne’e nia dehan, momentu sira implementa despaxu ne’e, sira konsege prende karreta kontentór rua, maibé daudaun ne’e kompañia na’in mai kumpre ona sira devér no foti fila ona sira transporte refere.
“Koimas ne’ebé ita fó mak artigu 10, lei kódigu estrada, sira selu koimas 75 USD,” nia informa.
1,348 total views, 3 views today
Bele hare Video Seluk :