Dili (timorpost.com) – Prezidente Konsellu Imprensa (KI), Virgílio Guterres, konsidera papél média iha tempu uluk to’o agora importante tebes.
Nia hatete, papél média importante tanba hanesan forma edukativa hodi inspira Ema hotu-hotu.
“Liuhusi media sidadaun hotu-hotu iha area rural bele hatene saida maka akontesimentu iha nasaun, povu bele hatene progresu dezenvolvimentu iha ita nia rai”, nia hateten iha salaun Laline Larigutu CNE, Tersa (11/10).
Nia dehan, buat ida ne’ebé sai pergunta maka ne’e hafoin Timor-Leste restaura nia independénsia ba dala-20 ona, maibé Estadu Timor seidauk investe iha dezenvolvimentu media, mezmu iha Tinan 2020 Governu iha ona Planu Estratéjiku Dezenvolvimentu Nasionál.
“Ita hahú restaura independénsia Estadu Timor investe ka lae iha dezenvolvimentu media, maibé tuir ha’u-nia haree Estadu Timor-Leste seidauk dezenvolve media ho di’ak, tanba husi planu 2020 no planu estratéjiku dezenvolvimentu nasionál, la haree pájina ruma ne’ebé ko’alia kona-ba prosesu dezenvolvimentu media”, nia preokupa.
Alende ne’e, nia dehan fatór seluk maka media sira agora seidauk halo nia knar los hanesan instrumentu kontrola sosiál, jornalista barak laiha korajen atu halo pergunta ho asuntu sira ne’ebé sensitivu hanesan abuza seksuál no korrupsaun, dala-barak media internasionál sira maka halo kobertura ba iha problema sira iha Rai laran relasiona ho problema korrupsaun, media iha Rai laran kobertura liu kona-ba serimoniál sira.
Tan ne’e Prezidente KI ne’e husu mós jornalista sira atu barani foti desizaun tuir faktu ne’ebé konkreta, entaun presiza aumenta koñesimentu atu bele kestiona Ema boot sira.
2,661 total views, 15 views today
Bele hare Video Seluk :