DILI (timorpost.com) — Konsellu Populár Defeza, Repúblika Demokrátika Timor-Leste (CPD-RDTL), Segunda (10/10), iha Palásiu Prezidensiál Bairru-Pité, iha oras tuku 10:00, hato’o ezijensia ba Prezidente Repúblika, José Ramos Horta, kona-ba tenke halo diálogu ba Povu Maubere.
“Husu ba Prezidente Repúblika, tenke halo Diálogu ba Povu Maubere. Halo Diálogu tanba povu oras ne’e halerik hela ba Justisa, hamrok hela Justisa, Justisa ne’e mak dala-ruma fó perturbasaun hela ba povu ho estadu,” hateten Portavós CPD-RDTL, Teki Liras.
Teki Liras, hatete sira-nia protesta ba iha Xefe Estadu, ho objetivu atu bele hasai Julmira ho Manuel Tilman.
Enkuantu kona-ba Julmira ho Manuel Tilman, konsege Jornalista husu katak husi sira ne’e kaer kaju ruma hasoru CPD-RDTL sira? Nia hatán katak aban mak jornalista sei rona.
Hatán ba ezijensia ne’e, Asesor Sosiedade Sivíl, Prezidente Repúblika, Quintiliano Moniz Carvalho, dehan sira-nia ezijensia ne’e haree liu ou husu ba Prezidente Repúblika atu halo Diálogu ho komunidade sira liuliu Veternu sira, Sosiedade Sivíl no komunidade en-jerál hotu.
Ne’e mak Diálogu ne’e, Prezidente Repúblika realiza daudauk hanesan iha fulan hirak liu ba realiza iha Ermera, Ainaru ne’e mak Diálogu ho Komunidade sira, Sosiedade Sivíl, Veteranu sira no hotu-hotu.
“Agora ida sira-nia ezijensia ohin ne’e, karik kaju ruma sei iha Tribunál, mais la hatene, ohin ami mós la hatene. Hakfodak tanba sira mai para iha ne’e mak ami sai mai husu ba sira kona-ba oinsá, sira mai nakonu iha ne’e tanba saida, keta iha sujestaun ruma ka, ou iha difikuldade ruma hodi hato’o ba Xefe Estadu karik,” Asesor Quintiliano afirma.
Husi ne’e mak Asesor Quintiliano sai ba hasoru sira hodi ko’alia ho sira, maibé Asesor Quintiliano la hatene sira-nia motivu loos ne’e saida, sira-nia ezijensia loloos ne’e mak sira dehan Diálogu, mais Diálogu Prezidente Repúblika nakloke hotu, palásiu ida ne’e dezde primeiru Prezidente Repúblika deside katak, palásiu ne’e ba Povu, ne’e povu nian, entaun nakloke ba sé sé de’it hodi atende.
“Kona-ba Diálogu, ami la’o ona, agora hein Diálogu ida ikus liu iha Munisípiu Dili, parese ami sei realiza iha Outubru nia laran, ne’e ba komunidade, juventude, Inan-Aman sira, Veteranu sira no Sosiedade Sivíl tomak sei realiza Diálogu iha Munisípiu Dili, hodi Prezidente rona sira-nia difikuldade ou sira-nia programa ruma,” nia hateten.
Ikus nia dehan, “Orasida sei hein ha’u atu informa ba prezidente kona-ba sira-nia ezijensia sira ne’e, mais ita la hatene objetivu saida, mais ha’u hatene no ha’u sita uitoan de’it sira hakarak ezije Diálogu ho komunidade sira”.
2,704 total views, 3 views today
Bele hare Video Seluk :
Subscribe to Timorpost
