DILI (timorpost.com) – Ministru Asuntu Parlamentár no Komunikasaun (MAPKOMS), Francisco Jerónimo, hatete ohin nia parte ko’alia ho Primeiru Ministru (PM), Taur Matan Ruak, kona-ba atu harii Institutu Formasaun ba Komunikasaun Sosiál no Multimedia.
“Ohin ha’u informa ba Primeiru Ministru, kona-ba atu harii Institutu Formasaun ba Komunikasaun Sosiál no Multimedia, entaun ohin ha’u ko’alia no aprezenta relatóriu,” dehan Francisco Jerónimo, iha Rezidénsia Primeiru Ministru (PM), Taur Matan Ruak, Faról, Segunda (03/10).
Nia aumenta, tanba ne’e nia parte aprezenta relatóriu ba Primeiru Ministru ho estudu ne’ebé sira halo no iha tiha ona hodi haree no ninia progresu ba futuru.
“Tanba ita agora ko’alia kona-ba sustentabilidade, entaun oinsá atu sustenta Institutu ne’e ba futuru, ekonómikamente iha dalan ka lae no bele moris ka lae, keta halo ba ita harii tiha mate fali,” hateten nia.
Ho ida ne’e ohin nia parte aprezenta no entrega ona ba Primeiru Ministru hodi haree no tetu atu foti desizaun kona-ba ida ne’e, tanba ne’e agora hein desizaun.
“Primeiru Ministru husu ha’u-nia opiniaun ha’u esplika estudu ne’e rasik ha’u envolve, tanba ne’e ha’u entrega ba hodi foti desizaun, maibé to’o agora ita seidauk atu halo preparasaun ba rekursu no ekonómika atu jere ne’e seidauk halo preparasaun ba ida ne’e,” hateten nia.
Nia deklara tan, maski agora iha ona sentru formasaun ba Jornalista CEFTEC iha ona, maibé agora presiza tan halo preparasaun ba futuru ninian.
“Primeiru Ministru ohin dehan nia prontu simu no nia sei haree atu nune’e semana oin lori fali mai atu halo diskusaun kle’an liután kona-ba ida ne’e hodi bele foti desizaun,” nia hakotu.
1,172 total views, 6 views today
