DILI (timorpost.com) – Atu hanoin hikas di’ak tomak, Funsionáriu Marketing matebian Jape Kong Su nian hatuur ona imajen ne’ebé enfeita ho ai-funan iha Timor Plaza.
Tuir observasaun Timor Post iha terrenu, funsionáriu sira ne’ebé servisu ho matebian Jape Kong Su, iha Timor Plaza, prepara ona fatin hodi hatuur imajen matebian nian no koloka ema na’in rua mak halo seguransa.
Informasaun ne’ebé jornalista asesu mós katak, atividade hadeer matebian nia imajen ne’e to’o loron 6 fulan Outubru bainhira lori mate isin hosi Australia mai Timor-Leste.
Seguransa sira sei troka malu hodi asegura fatin ne’e durante oras 24 to’o família matebian lori isin mate Jape Kong Su nian mai Timor.
Fatin ne’ebé funsionáriu sira kria, oras ne’e iha mós emprezáriu balun mak lori ona ai-funan hanesan símbolu domin ba rai hamutuk iha ne’ebá.
Nune’e mós iha Timor Plaza, atividade negósiu sira la’o normál, iha de’it eskritóriu matebian nian mak taka no hapara atividade sira hanesan Tais Market no eventu Domingu.
Portantu matebian bainhira to’o iha Timor-Leste sei halo vizita de’it ba Timor Plaza, kontinua kedas ba haloot iha Hera.
Entretantu iha loron Segunda (26/09), Lia rekadu mai hosi família Jape. Figura prinsipál Jape Kong Su, badaen negósiu (businessman) timoroan dahuluk ho seriedade transforma rai mamuk ba objetivu fíziku real, sentru ba atividade ekonomia Timor-Leste nian.
Timoroan jerasaun sira ne’ebé sei moris iha dékada rua ka tolu tuir mai sei la haree direta ka hasoru entre face to face (oin ho oin-red) figura timoroan Jape Kong Su. Sera ke bele reprezenta hela monumentu ruma ou imajen fotografia sira liuhosi muzeu ki’ik ruma ne’ebé prezerva memória balu, oras ne’e iha ema-nia leet Timor plaza maka sai hela lalatak ka obra estraordináriu ne’ebé Jape Kong Su husik hela ba nasaun Timor-Leste.
Tinan 10 ikus ne’e, timoroan tomak hosi loro sa’e to loro monu, tasi feto no tasi mane, bainhira tama sidade Dili, Timór Plaza ne’ebé lokaliza iha Komoro Dili, sai alvu vizita hodi kompras. No komunidade iha Dili tantu nasionál no estranjeiru sempre hetan animasaun ka harame bazar night kada sesta kalan. Timor Plaza sentru komérsiu luxu ho klase internasionál dahuluk iha Timor-Leste nu’udar obra hosi badaen negósiu (Businessman) sidadaun ne’ebé moris iha entre Maubara no Balibó ne’e.
Area Timor Plaza aleinde hanesan fatin komérsiu, famozu ho formatu komún iha internasionál maka hanaran CBD Central Business District hanesan integra espasu kompletu bele hetan ka asesu ba loja kompras, eskritóriu, otél, restaurante no banku inklui fatin ba animasaun no divertimento nian to’o jogu klase elit ka Casino.
Fatin ne’e hari husi Dili Dezenvolvimentu L.d, ne’ebé mai husi empreza Grupu Jape, espesializada iha evolusaun propriedade ne’ebé boot ho kualidade aas ba arrendamentu retallu, rezidénsia no instalasaun eskritóriu.
Grupu Jape harii husi matebian Jape Kong Su iha Darwin (Australia), Territóriu norte – ne’ebé iha 1976 no pertense husi família, ne’ebé nia hun iha Timór Lorosa’e.
3,791 total views, 3 views today
Bele hare Video Seluk :
Subscribe to Timorpost
