DILI (timorpost.com) — Centro de Estudos para a Paz e Desenvolvimento (CEPAD), ho Uniaun Europeia (UE), halo lansamentu filme series foun “Ha’u-Nia Diretu Atu Hatene” hodi marka loron mundiál asesu ba informasaun no fó atensaun ba importánsia husi papél sidadaun ida-idak nian, atu tane aas prinsípiu governasaun di’ak, responsabilizasaun no inkluzaun hodi promove partisipasaun máximu públiku nian iha prosesu foti desizaun liuhusi asesu ba informasaun.
CEPAD no UE komemora loron ida ne’e ho atividades oin-oin, ho tema ba selebrasaun tinan ida ne’e nian iha loron 28 Setembru mak “Intelijensia Artifisiál, E-governance no Asesu ba Informasaun” ne’ebé hola fatin iha Muzeu Rezisténsia, Dili.
Produsaun filme ne’e inspira husi istória susesu sira, ne’ebé membrus komunidade balu hetan hafoin hola parte iha atividades Diskusaun Fokus Grupu mak CEPAD hala’o ona ho finansiamentu husi Uniaun Europeia atu “Asegura responsabilizasaun Governu nian ba Covid-19, no promove asesu ba informasaun iha Timor-Leste”, prefere Nota Imprensa husi CEPAD.
Objetivu prinsipál komemorasaun ba eventu Loron Mundiál Liberdade Asesu ba Informasaun ne’e mak atu hakbi’it sidadaun nia koñesimentu liuliu maluk feto sira nian kona-ba sira-nia direitu atu hatene informasaun públiku, hodi ikus mai hadi’a sira-nia asesu ba edukasaun, fasilidades saúde no rekursus seluk ho kualidade.
Enkuantu iha eventu ne’e CEPAD hamutuk ho Prezidente Parlamentu Nasionál (PPN), Aniceto Longuinhos Guterres Lopes, Embaixadór Uniaun Europeia iha Timor-Leste, Marc Fiedrich no membru sira husi Grupu Traballu Nasionál-Liberdade Asesu ba Informasaun CEPAD, no reprezentante sira xave husi komunidade, Pontu Fokál programa nian no Servidór Públiku, Autoridade Lokál no konvidadu sira seluk mak reprezenta organizasaun Sosiedade Sivíl no Akademia.
Entretantu eventu ne’e mós Embaixadór Uniaun Europeia iha Timor-Leste, Marc Fiedrich, dehan Uniaun Europeia fahe valór universál importante sira ho Timor-Leste. Nune’e husi parte Embaixadór Marc Fiedrich hala’o parseria longu prazu ne’ebé bazeia ba Timor ho Europa nia fiar ba demokrasia, direitus umanus no estadu direitu.
“Ho kestaun hirak ne’e hotu, mak ami envolve Governu, ho Lei na’in no ho Sosiedade Sivíl sira. Serbisu ne’ebé CEPAD hala’o hela ho apoiu husi UE atu reforsa Governu nia responsabilidade liuhusi Promosaun livre informasaun ne’e, hanesan projetu ida husi projetu barak ne’ebé oras ne’e hala’o ho Sosiedade Sivíl iha munisípiu hotu-hotu”, Embaixadór Marc Fiedrich afirma.
2,123 total views, 3 views today
Bele hare Video Seluk :