Dili (Timor Post) — Ministériuriu Administrasaun Estatál (MAE), planeadu dólar amerikanu rihun 90 USD, ba komemorasaun loron Konsulta Populár ne’ebé monu iha loron 30 fulan Agostu tinan ne’e, ho nia Tema “Hametin Pás no Estabilidade”.
Ministru Administrasaun Estatál, Miguel Perreira de Carvalho, hatete hanesan Prezidente Komisaun Organizadora kona-ba loron Konsulta Populár, atu informa mós atividade komemorativa sira ne’ebé la’o ona, no sei la’o iha loron hirak tuir mai to’o iha loron 30 Agostu, Ne’ebé la’o ona iha Suku no postu Administrativu sira liuliu iha Dili, hodi komemora loron Konsulta Populár ba dala 23.
“Ohin informa ba Xefe Estadu, katak iha loron 29 lokraik iha Missa ida iha uma Kreda Katedrál Dili, hafoin Missa remata populasaun sira ne’ebé iha disponibilidade sei ba iha Palásiu Governu, hodi kare ai-funan iha tasi Palasiu Governu nian,” Ministru Miguel hafoin remata enkontru ho Xefe Estadu, iha Palásiu Prezidensiál, Bairru-Pité, Sesta (26/08).
Ministru ne’e informa, iha loron 30 Agostu Komisaun Organizasaun konvida ema hotu inklui populasaun sira iha Dili, atu hahú iha horas 7 ba 8 halo konsentrasaun iha Rotunda Saudozu Francisco Xavier do Amaral, iha Merkadu Lama, atu halo marxa ida husi ne’ebá, sa’e ba Santa Kruz no sei remata iha Jardín 5 Maiu Kolmera.
“Iha Jardín 5 Maiu mak seremónia ne’e sei termina iha ne’ebá. Ohin hato’o pedidu ba Xefe Estadu, atu bele hato’o diskursu, hodi fó mensajen ba ita-nia nasaun loron importante ida ne’e. Prezidente Repúblika José Ramos Horta, disponivel atu marka prezensa iha seremónia sira loron 30 Agostu nian,” nia hateten.
Enkuantu Ministru Miguel, mós aproveita oportunidade ida ne’e, atu konvida ema hotu-hotu, liuliu sira ne’ebé hela iha Dili, atu iha loron 29 lokriak, bele partisipa Missa iha Katedrál Dili, no iha loron 30 dadersan tuku 8 meia, konvida populasaun sira hodi besik ba Rotunda saudozu, Francisco Xavier do Amaral, atu bele halo marxa ida ba to’o Jardín 5 Maiu.
Ho ida ne’e mós Komisaun Organizadora iha ona programa atu halo konsertu sira, dada sorteiu, no eventu sira seluk hodi komemora loron 30 Agostu.
“Orsamentu planeadu ba loron Konsulta Populár 30 Agostu besik dólar amerikanu rihun 90 USD, no ida ne’e nia despeza halo ona kuaze fulan ida, liuliu ba eventu desportu sira, iha Suku no postu Administrativu sira no mós semináriu nasionál ne’ebé realiza iha Sentru Konvensaun Díli,” Ministru afirma.
Kona-ba Tema iha loron Konsulta Populár mak “Hametin Pas no Estabilidade, Hodi Kontribui ba Dezenvolvimentu iha ita-nia rain”.
Ikus nia dehan, Tema ida ne’ebé importante tebes iha momentu ida ne’ebé restaura indepedénsia tinan 20 ona, no mós povu bainhira hato’o sira-nia vontade hodi ba vota ukun rasik an liu ona tinan 23, ne’e hanesan momentu atu hotu-hotu halo reflesaun kona-ba alkansu sira ne’ebé durante Estadu no povu hetan ona.
1,826 total views, 6 views today
Bele hare Video Seluk :
Subscribe to Timorpost
