DILI (Timor Post) — Vise Xefe Estadu Maiór Jenerál Forsa Armadas (XEMJFA), Majór Jenerál Calisto dos Santos “Coliati’, Kinta (26/08), reprezenta Tenente Jenerál, Falur Rate Laek, hala’o enkontru ho Prezidente Repúblika, José Ramos Horta, hodi relata situasaun iha area militár nian.
Nia hatete, ohin nia reprezenta Jenerál Xefe, Tenente Jenerál, Falur Rate Laek, tanba Jenerál horisehik loron (25/08), konsege ba Oe-kusi, ba hala’o serimónia inaugurasaun ba baze militár iha Oekusi.
“Ha’u ohin reprezenta Jenerál, mai hasoru Prezidente Repúblika, atu informa kona-ba situasaun iha area militár, durante fulan Agostu nia laran”, nia hateten hafoin hasoru Xefe Estadu iha Palásiu Prezidensiál Bairru-Pité.
Nia informa, kona-ba situasaun seguransa, dezenvolvimentu ba Tropa, ida ne’e mak sira informa ba Prezidente Repúblika.
Alende ne’e kona-ba rekrutamentu faze daruak nian, Majór Jenerál “Coliati”, hatete laiha duvida, rekrutamentu ne’e hanesan matéria ida.
“Rekrutamentu ne’e matéria ida, maibé matéria ne’ebé tékniku liu, ne’e laiha nesesidade atu ko’alia ho Prezidente Repúblika, maibé Prezidente atu ko’alia kona-ba kestaun ne’ebé estratéjiku, la ko’alia kona-ba kestaun Operasionais,” Coliati afirma.
Nia hatutan, “Rekomendasaun Prezidente husu mantein dixiplina hanesan militár, bazeia ba iha regulamentu dixiplina militár, komportamentu militár iha sosiedade oinsá, no komportamentu iha ninia baze hanesan militár,” Coliati relata.
Ikus liu detallu kona-ba rekrutamentu, Majór Jenerál Coliati, fó kompeténsia ba komisaun rekrutamentu, tanba la hola parte iha komisaun rekrutamentu, portantu se iha faze final kona-ba rekrutamentu, ida ne’e komisaun rekrutamentu sei halo relatóriu ba Komandu, kuandu relatóriu to’o ona iha Komandu, depois ida ne’e foin bele hatene.
1,594 total views, 3 views today
Bele hare Video Seluk :