Dili (Timor Post) – Relasiona ho ekipa konjunta husi Servisu Nasionál Intelijénsia, Polísia Militár, F-FDTL, no Polisia Sientífiku Investigasaun Kriminál (PSIK), konsege kaptura sidadaun Timor-Leste na’in-9 ne’ebé halo tranzasaun droga, Prezidente Repúblika, José Manuel Ramos Horta, husu ba Joven sira atu labele envolve iha krime droga.
Xefe Estadu hatete, nia parte akompaña hela kestaun Droga ne’e, maibé ida ne’e sei pertense ba Polísia no Judisiál.
“Ha’u akompaña, mais ne’e pretense ba ita-nia Polisia no Judisiál, kuandu elementu ruma, ka sé de’it mak envolve iha krime droga, hanesan hotu-hotu hatene katak, iha Timor-Leste ne’e krime, iha ASEAN tomak ou iha mundu tomak ne’e krime”, nia hateten hafoin partisipa iha Aniversáriu Ezisténsia ASEAN nian ba dala-55, iha Embaixada Tailándia Motaél, Segunda (15/08).
Nia dehan, envolve iha droga ne’e konsekuénsia, kuandu Timoroan ruma envolvidu karik, únika ba buat ida ne’ebé Governu bele halo maka, fó apoiu konsulár, se iha ema seluk envolve iha rai laran ne’e tuir lei rasik.
Portantu husi Xefe Estadu, katak klaru nia sempre preokupa no sempre hakarak haree Timor-Leste laiha Droga.
“Ha’u hatene iha rai sira ne’ebé organizadu tebes hanesan iha Europa la konsege taka problema ida ne’e, hanesan Amérika sub-potensiál númeru um la konsege, Singapura, Indonézia la konsege, tanba difisil tebes atu kontrola,” nia afirma.
Enkuantu Timor-Leste bele dehan Estadu frazil nafatin, ne’e duni perigu, mais pur-enkuantu di’ak, tanba Timor-Leste nia sosiedade monu ba tentasaun droga.
“Nu’udar Prezidente, nu’udar líder nasionál kontinua ko’alia ba joven sira, soe droga, soe alkóliku, soe violénsia, kuidadu droga mais pur-enkuantu ita Timor ladún problema boot ida,” nia hakotu.
1,999 total views, 3 views today
