DILI (Timor Post)- tuir dadus husi Komisaun Terras no Propriedade, katak Munisípiu Dili mak okupa númeru dahuluk ba kazu disputa rai iha Timor-Leste.
“Kazu Disputa rai ne’ebé agora rejistu iha ha’u-nia gabinete hamutuk 35 ital Kazu, no dadus ne’e ema husi NGO internasionál sira mak lori diretamente ba entrega iha ne’ebá,” dehan Prezidente Komisaun ba Terras no Propriedade, Pascoal da Costa Soares, iha Universidade Dili, Kinta (04/08).
Nia reforsa tan, dadus balun mós sira hetan husi gabinete Ministru Justisa nian rasik inklui kazu sira mai husi Provedoria Direitus Umanus no Justisa.
“Kazu ne’e tuir dadus maioria ka númeru boot liu iha munisípiu Dili, tuir mak iha Lautem, Baukau no munisípiu hirak seluk tan,” hateten nia.
Maibé, nia dehan, daudaun ne’e sira mós komesa hahú prosesu kazu hamutuk 24 ka hadi’a ona nia painél administral atu haree no analiza tantu jurídiku no mós tékniku ninian.
“Ami bele foti desizaun ba se loos mak atu sai na’in ba rai ida ne’ebé sira Disputa daudaun ne’e,” nia subliña.
Nia mós konta, kazu ne’e la’ós akontese entre komunidade ho komunidade de’it, maibé iha mós kazu entre komunidade ho estadu relasiona patrimóniu Estadu ka propriedade estadu nia ne’ebé komunidade sira balun okupa.
1,702 total views, 3 views today
