Dili (Timor Post) – Tuir dadus Survey Nasionál husi Sekretaria Estadu Komunikasaun Sosiál (SEKomS), hatudu Jornál imprime ne’ebé komunidade gosta asesu dahuluk mak Timor-Post, ho valor 48,39%.
“Jornál Imprimi ba polítiku nasionál ne’e Timor Post mak domina, tuir maka STL ho Independente,” Carsiliano Oliveira, nu’udar Responsavel Survey Nasionál, afirma iha aprezentasaun rezultadu Survey kona-ba Persepsaun Públiku ba Mídia Estatál no Privadu, iha auditóriu PCM-Palásiu Governu, Kuarta (03/08).
Nia dehan, Komunidade asesu ba jornál imprime, STL 15,51%, Independente 13.73%, Diariu Nasionál (DN) 11,44% no Dili Post 10.93%.
Nafatin dadus ne’e hatudu katak, komunidade ho 38,81%, maka asesu informasaun Politíku, Internasionál, liuhusi Jornál Timor Post. Persentajen ida ne’e ás tebes kompara ho mídia sira seluk.
Portantu média Imprime STL maka ho pursentu besik uitoan ba Timor-Post, maibé ladún signifikante ho 17,63%.
Alende ne’e mós iha dadus kona-ba Komunidade sira gosta asesu informasaun ba asuntu ekonomia no negósiu husi Mídia Imprime Timor-Post ho 42,03%.
Husi dadus ne’e fó informasaun mai katak, mídia sira ne’ebé diferente ki’ik, ne’e sei bele iha mudansa bainhira hadi’a sira-nia kualidade, divulgasaun gráfiku.
1,676 total views, 9 views today
