Dili (Timor Post)— Ohin Embaixadór Australia Bill Costello hamutuk ho delegasaun hasoru malu ho Prezidente Partidu Demokrátiku (PD), Mariano Asanami Sabino Lopes, hodi ko’alia asuntu ekonomia no agikultura.
Prezidente Partidu Demokrátiku (PD), Mariano Asanami Sabino Lopes, hatete alvu prinsipál husi prezensa embaixadór Australia nian ne’e ko’alia kona ba apoiu Governu Australia nian ba setór agrikultura no ekonomia rai laran nian, dezenvolve oinsá programa ba futuru.
“Ita hotu hatene katak Governu Australia hanesan nasaun ne’ebé mak apoiu buat barak iha rai laran, apoiu nee antes ita Independénsia no nafatin apoiu to agora”, Nia hatete hafoin vizita remata iha Sede PD, Kolmera, Sesta (24/06).
Nia hatete, iha soru mutu ne’e mós parte rua ko’alia kona-ba traballadór Timor oan sira ne’ebe mak agora daudauk servisu iha Australia no mós kona ba oinsá Governu Australia nia ajuda hodi apoiu ba Agrikultura e Pekuária Timor-Leste nian bainhira tama ba membru ASEAN.
“Governu Australia sempre iha apoiu tomak hodi haforsa agrikultura rai laran, no oinsá maka ita atu halo Timor Leste ninia ekonomia ba futuru, ida ne’e mak íntimu husi diskusaun ohin nian”, Nia hatete.
Entretantu embaixadór Australia, Bill Costello, afirma ohin sira mai vizita Sede Partidu Demokrátika hodi hatene di’ak liu tan ba programa saida de’it iha rai laran hodi nune’e bele kontinua,
“Vizitasaun ida ne’e hodi hatene kona ba oinsá, Timor-Leste nia programa saida de’it iha agrikultura, pekuária, hodi hadi’a sistema ekonomia rai laran, ida ne’e mak ami diskute, no mós iha Vizitasaun ne’e mós hanesan introdús an tanba ha’u hanesan embaixadór foun mai Timor-Leste” nia dehan.
Nia haktuir, Iha diskusaun ne’e mós ko’alia kona ba oinsá planu estratéjia entre Governu rua ne’e kona Seguransa Marítimu no peska ilegál iha rai laran.
2,068 total views, 3 views today
Bele hare Video Seluk :