Reportajen Estaziada Beatriz Belo/Asistente Editor Hermenegildo da Costa Tilman)
Dili (Timor Post)—Konsellu Imprensa (KI) ohin distribui kartaun Profisionál ba jornalista na’in-ualu, iha GOLDEN STAR Audian, hafoin remata formasaun durante fulan neen.
Tuir prezidente Konsellu Imprensa, Virgílio da Silva Guterres, hatete kartaun profisionál ne’e hanesan identidade ne’ebé bele prova ba instituisaun ne’ebé mak ita atu ba ne’e, reprezenta profisaun jornalista nian.
“Kartaun profisionál ne’e laos signifika katak ita hatene buat hotu ona, maibé kartaun profisionál ne’e simplesmente hanesan identidade ida, para ita buka informasaun liu husi públiku, konfiansa públiku ne’e mak ita nia leitór sira, ita nian telespetadores sira no ita nia rona na’in sira, sira nia konfiansa ne’e mak importante liu, ” Prezidente Konsellu Imprensa (KI), Virgílio da Silva Guterres, hatete iha nia diskursu hafoin remata distribuisaun ba kartaun profisionál iha GOLDEN STAR Audian, Tersa (14/06).
Nia dehan, jornalista sira ne’ebe mak simu ona kartaun profisionál ne’e labele profisionál de’it iha momentu ita hakerek notísia liuhusi entrevista, maibé maneira ne’ebé mak ita hakerek iha ita nia status iha Facebook tenke hakerek profisionál nafatin.
“Pontu importante ne’ebe ha’u atu hameno mak ne’e, ita hanesan jornalista profisionál tenke interpreta didi’ak situasaun klimátika sira, no tenke prenxe interese públiku nian ho diak hatudu liu husi ita nia profisionalizmu servisu nian,” nia dehan.
Entretantu, jornalista na’in ualu ne’ebe mak ohin simu kartaun profisionál mai husi Instituisaun media ne’ebe la hanesan, Vanesa Auxiliador da Cunha ho Natalino de Jesus Dias husi Media GMN, Floriana dos Santos Borges ho Jose Manuel B Sarmento husi Media Naunil, Blandina Mauno ho Crisogono Magalhães husi Media STL, Jose Caet husi Media Timor Post no Mirandonia Darvinia Barros Soares husi Media Tatoli. Hakotu (Lee Notísia Seluk Iha Jornál Timor Post/Asesu You Tube Timor Post)
862 total views, 3 views today
Bele hare Video Seluk :