Jornalista: Jaime Pires/Editor Augusto Sarmento
DILI (Timor Post)- Alfándega ‘dukur’ kompañia Klinika (KMF), hatama ai-moruk Ilegál Husi Índia la halo inspesaun hodi tama mai to’o iha SAMES.
“Ida ne’e mak ohin ha’u enkontru ho ami nia pesoál sira normalmente sasan sai husi Alfándega sasán sira moos ona no tais ona ne’e mak mai to’o iha ami nia fatin SAMES, maibé infelismente sasán ne’ebé mak to’o iha ami nia fatin laloos,” dehan Ministra Saúde, Odete Maria Belo, ba Jornalista sira hafoin tun direita hare Aimoruk Ilegál ne’ebé mak ekipa Investigasaun halo inspensaun iha edifísiu SAMES Kampu Alor, Tersa (14/06).
Nia aumenta tan, agora presiza ko’alia ho Alfándega no ema sira ne’ebé mak servisu iha Portu Dili ninia ne’e.
“Ita tenke husu sira Alfándega tanba saida mak sasán sira ne’ebé mak sasán sira ne’ebé mak hasai mai ne’e la chek uluk, ne’ebé ita fila fali ba sira tanba sira mak hatene sasán sira tama husi kontektor laran mai, agora parte Investigasaun mai deteta fali iha SAMES,” hateten Nia.
Tanba sasán sira ne’e tama mai iha SAMES maibé laiha dadus no laiha manufaktor ida ne’ebé mak loos ne’e liga kedas ho falsifikasun no aimoruk ne’e ba hola iha ne’ebé la hatene.
Nia mós dehan, kontratu ne’ebé mak sira aprova hodi kompañia ho naran inisiál (KMF), atu hatama ne’e item lima hodi sosa iha Índia atu lori mai, maibé realidade aimoruk item lima ne’ebé mak sira husu la mai, maibé sira falsifika hotu dokomentus no aimoruk sira naran troka hotu no liutiha fali item lima.
“Ita entrega ba parte Investigasaun hodi halo nia servisu, no prosesu tuir Lei ne’ebé mak iha, karik kompana ne’e falsifika duni sansaun sidadaun mak fó ba kompañia ne’e, tanba iha Ministériu Saúde rasik mós iha ekipa ida hodi hare kona ba ida ne’e,” Nia hakotu.
Tuir informasaun ne’ebé mak Timor Post hare, sasán sira ne’e tama ho númeru kontentor ne’e mak la tuir iha dokomentu no ekipa Alfándega mós la halo inspesaun uluk molok lori sai aimoruk ne’e mai iha SAMES.
Enkuantu relasiona ho kazu ida ne’e Polísia Servisu Investigasaun Kriminál Nasionál (SIKN), lori ona responsavel husi (KMF) na’in rua no broker na’in ida ba edifísiu (PNSIK) Kaikoli hodi Tuir prosesu investigasaun, nune’e detein kedas iha sala detensaun.
744 total views, 3 views today
