(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post) – Asosiasaun Rede Feto Timor-Leste hamutuk ho Sekretáriu Estadu Igualdade no Inkluzaun (SEII), Plan Internasionál Timor-Leste (PITL) no mós asosiasaun sira husi Organizasaun Sosiedade Sivíl, lansa asembleia membru anuál ba períodu tinan 2020-2021, ho tema “Hamutuk Hametin Igualdade ne’ebe Inkluzivu no Sustentabilidade, hodi bele tau matan mós ba membru sira no mós direitu feto sira nian”.
Prezidente Ezekutivu, Rede Feto Timor-Leste, Jelia Fernandes, informa, tuir artigu 23 iha estatutu rede feto Timor -Leste nian, define katak, asembleia membru anuál tinan ida hala’o dala ida, maibé ami la konsege halo iha tinan 2020-2021, tanba ho situasaun iha rai laran.
“Loron ida ohin kompete ba iha asembleia Membru anuál ho objetivu husi asembleia refere iha pontu haat, husi haat ne’e ida mak aprezenta relatóriu anuál ba iha narrativa no relatóriu finansas 2020-2021 nian, no ida seluk sei aprova Planu Anuál 2022, maski ita hatene tarde ona, maibé tanba anuál mós la’o tarde entaun tenke aprova Planu Anuál Rede Feto Timor-Leste nian ba tinan ida ne’e,” nia dehan ba Jornalista sira iha salaun Delta Nova, Kinta,(02/06).
Nia hatutan, Rede Feto mós sei halo kompete ba iha asembleia membru anuá, mak sei simu membru foun ne’ebé mak durante ne’e halo ona aplikasaun mai iha Rede Feto.
“Objetivu ida seluk maka, hapara membru sira ne’ebé mak viola Estatutu Rede Feto Timor Leste nian, ida ne’e mós sei aprezenta iha forum, forum mak sei deside hapara ou la hapara, nafatin simu ou la simu,” nia afirma.
Entretantu, membru ne’ebé iha Asosiasaun Rede Feto hamutuk na’in-46, maibé iha fundadores balun ne’ebé mak individual ne’e sei iha, maibé balun la eziste ona.
Rede Feto sei kolabora ho Vice Prezidente Grupu Mulheres Parlamentár, ne’ebe nu’udar deputadu iha órgaun lejizlativu, iha kompromisu diak hodi hare no tau matan ba direitu feto nian. Nia dehan.
“Órgaun rua ne’e halo koopera liu-liu fó hanoin ne’ebé mak durante sai preokupasaun, ne’ebé antes ne’e, foti ona iha kongresu nasionál Feto nian, oinsá mak bele hapara violénsia kontra feto no labarik,” hakotu. (Lee Notísia Seluk Iha Jornál Timor Post/ Asesu You Tube Timor Post)
125 total views, 3 views today
