MANUFAHI—Komandante Komandu Polísia Munisípiu Manufahi, Superintendente, Joni Viana das Regras, hatete, kazu taa malu ne’ebé akontese Tersa (29/03), iha Aldeia Namaluli, Suku Lesuata ne’e tanba deskonfia malu.
“Kronolojia husi akontesimentu ne’e bainhira JG ho família sai husi Aldeia Fohonaru, Suku Liu Rai, ba iha V ninia uma iha Aldeia Namaluli, Suku Lesuata atu konfirma kona-ba deskonfia oan ka beioan hetan isin rua,” dehan, Joni ba jornalista iha nia knaar fatin, Same, Kuarta (30/03).
Momentu hasoru malu JG husu ba V katak “o koñese ha’u ka la’e nune’e inisiál V hatán hodi dehan “ami koñese ita mak ita hodi serve malu to’o ohin loron”.
“Motivu husi kazu asaltu malu ne’e tanba JG deskonfia nia mane foun fó fali isin rua ba ninia beioan maibé tanba parte JG ba ho emosaun maka’as nune’e labele kontrola hodi mosu ta’a malu,”dehan, Joni.
Lee Notisia Relevante :Taa Malu Entre Komunidade iha Turiskai, Na’in 1 Mate Fatin, 3 Kanek Todan
Nune’e bainhira sira parte rua halo diskusaun namanas no liafaun la simu malu nune’e matebian JG hasai katana hodi taa uluk nia mane foun V nia kotuk laran nune’e mane foun hakarak halo auto defeza ba aan rasik nune’e hodi lori fali katana taa fali nia tiun JG iha parte ulun to’o rezulta mate fatin.
“Ikus mai JG nia mane foun V ne’ebé hanesan suspeitu oras ne’e daudaun hetan kanek grave,” nia subliña.
Tuir Joni Kazu omisídiu agravadu ne’e akontese iha Aldeia Namaluli, Suku Lesuata, maizumenus tuku 12 meiudia, maibé tanba kondisaun estrada, klima no distánsia do’ok ne’e duni parte polisia to’o iha fatin akontesimentu iha tuku 4 loro kraik.
“Bainhira halo prevensaun polisia dezloka kedas suspeitu na’in rua ne’ebé sofre kanek todan ba hospital referal Maubisse no mate isin JG ohin ambulansia tula hodi ba halo autópsia,” nia relata.
Nune’e, prosesu tomak ba kazu asaltu malu ne’e iha ona polisia nia liman no ita hein polisia sei rekolla informasaun hotu hafoin atu kompleta iha tempu badak nune’e bele inkamina ba Ministeriu Publiku.
“Oras ne’e situasaun jerál iha fatin akontesimentu Aldeia Namaluli la’o kontroladu no parte família rua mós koopera ho polisia oinsá atu prosesa kazu ne’e ba tribunal maibé agora ba suspeitu sira oras ne’e daudaun sei iha hela iha prosesu investigasaun nia laran,” nia hakotu.(Asesu Notisia Seluk Iha Jornal Timor Post/ Asesu You Tube Timor Post)
844 total views, 3 views today
Bele hare Video Seluk :