Japaun Sei Apoiu Millaun $1 ba Prevensaun COVID-19 iha Timor Leste

husi -197 views

DILI—Governu Japaun sei apoiu osan ho montante millaun $1 liuhusi UNICEF ba prevensaun virus corona (COVID-19) iha Timor Leste.

Liuhusi komunikadu ba imprensa ne’ebé fó sai husi Palásiu Prezidensiál, Tersa (07/04/2020) haktuir, apoiu ne’e bazeia pedidu husi governu Timor Leste.

Profesional médiku rega hela aimoruk desinfekta ba embaixador Japaun ba Timor-Leste, Kinefuchi Masami ho nia espoza antes entrega kredensial. iha Salaun China Pálasiu Prezidente Nicolau Lobato, Dili 

Ministru Negosiu Estranjeiru no Kooperasaun, Dionísio Babo konfirma katak bazeia ba pedidu husi Governu Timor-Leste ninian, Japaun sei fó apoiu ne’e liuhusi UNICEF.

Entretantu Prezidente Repúblika, Francisco Guterres Lú Olo, apresia kooperasaun bilaterál Timor-Leste ho Japaun ne’ebé sai metin babeibeik.

Iha serimonia simu karta kredensiál husi Embaixadór Japaun ba Timor-Leste, Kinefuchi Masami, iha loron 7 abril, Prezidente Repúblika apresia tebes relasaun bilaterál ne’ebé sai metin babeibeik hafoin nasaun rua estabelese relasaun diplomátika desde 2002.

Prezidente Repúblika hato’o ninia kongratulasaun ba emperor foun. Prezidente Repúblika hein katak Embaixadór Kinefuchi Masami bele hatutan serbisu sira ne’ebé xefe misaun anterior hala’o tiha ona hodi hametin liután relasaun entre nasaun rua.

Embaixadór Japaun agradese Prezidente Repúblika tanba, maske iha situasaun difísil (Estadu Ermerjénsia), bele simu ninian karta kredensiál.

Japaun nu’udar país ida ne’ebé fó apoiu ba Timor-Leste desde kedas Timor-Leste hetan ninian independénsia. Reuniaun doadores dahuluk ba dezenvolvimentu iha Timor-Leste hala’o iha Japaun, iha 1999. Apoiu Japaun iha Timor-Leste iha área oioin hanesan: kapasitasaun rekursu umanus, agrikultura no dezenvolvimentu rural, infraestrutura, marítima, edukasaun, bee-moos, sanitáriu no kooperasaun trilateral tau matan ba kosteiras.

Governu Japaun konstrui edifísiu ba Fakuldade Enjiñaria UNTL iha Hera, Ponte Komoro no sei rehabilita aeroportu internasionál Prezidente Nicolau Lobato.

Governu Japaun fó nia apoiu ba prosesu adezaun Timor-Leste ba ASEAN no Organizasaun Mundiál Komérsiu.

Iha kooperasaun multilateral, Timor-Leste apoiu Japaun ba Komisaun Nasoins Unidas ba Direitu Internasionál Komérsiu, Komité Direitus Umanus, Komité Intergovernamentál ba Salvaguarda , Tribunal Internasionál ba Justisa, Vise Presidente Asembleia Jerál iha 2018 no Organizasaun Marítima Internasionál. (cao)