“Ita iha Situasaun Ida ne’ebé mak Difisil Uitoan”

by -112 views

Timor Post (12/01/2021)-Vise-Primeiru Ministru, no Ministru Planu Ordenamentu Teritóriu, José Reis hatete, iha luta kontra atake moras COVID-19, Timor Leste iha situasaun ne’ebé difisil tanba problema nesesidade ema nian.

“Ita iha situasaun ida ne’ebé mak difisil oituan, tanba hosi sorin ita atu evita ema mate tanba COVID-19, maibé hosi sorin seluk mós ema presiza atu haan,” José Reis subliña.

Tanba ne’e nia klarifika, governu foti desizaun la taka ba estabelesimentu komersial no eskola sira bele la’o nafatin maibé populasaun hotu tenke kumpri nafatin regra ba prevensaun COVID-19 inklui distánsia sosiál.

Nia dehan, estadu emerjénsia da-sia iha distansiamentu sosial no mós halibur malu labele liu ema na’in (10) iha fatin públiku, no ensere temporariamente postu fronteira, no mós MTK orienta ASETL atu limita transporte internasional no pasajeiru no mós APORTIL.

Nia dehan, iha momentu ne’ebá mós aprova rezolusaun governu nia atu impoin serka sanitaria ida iha rejiaun espesial administrativu Oekusi, hodi responde kazu sira ne’ebé mak identifika iha rejiaun, no atu halo prevensaun ba publiku ba surtu covid-19 hodi evita halo transmisaun iha teritoriu nasional.

Tanba momentu ne’e iha duni ema na’in 3 ne’ebé deteta no tama ilegalmente, maibé konsege lori fila fali ba kuarentena hodi hetan tratamentu no ohin iha Oekusi rezultadu negativu.

Jornalista: Jaime Pires

Editór: Noémio Falcão

No More Posts Available.

No more pages to load.