ADVERTISEMENT

Litha Esforsu Hosi Zero, Simu Xamada Milagre Hetok Aumenta Susesu

Mario da Costa - Istilu Moris
  • Share

Susesu la fasil hanesan ema ko’alia ka hanesan fila de’it liman iha minutu balun nia laran. Susesu presiza korajen no dedikasaun forte hodi hala’o misaun hodi dudu mehi sai realidade.

Rezultadu hosi susesu sempre la sees hosi dezafiu sira, hanesan hakur mota boot ka hasoru laloran boot. Tanba nee kada ritmu sempre ho ninia dezafiu rasik. esperiénsia hirak ne’e reflete moris hosi emprezária jerasaun foun Maria Litha Pinto na’in ba empreza ‘Litha Gallery’.

ADVERTISEMENT
SCROLL FILA BA NOTISIA


Siklu moris Maria Litha ninian hanesan mós feto timoroan em jerál, sempre hetan moral hosi inan-aman hodi atu sai ema di’ak. Bainhira sei otas natoon gosta ona nonton (haree televizaun), tanba hanesan feto, mosu iha Litha ninia hanoin hodi hatais vestidu ida di’ak hanesan model (estilista) sira hatudu iha televizaun.

Maski ne’e hanoin ka iluzaun uluk no ikus mai transforma ba realidade. Iha Dezembru 2022, Litha designer reprezenta Timor-Leste hodi partisipa iha palku internasionál Thailand Fashion week eventu fashion iha nasaun Tailándia.

Ohin loron bele dehan Litha tama ona iha ambiente negósiu ne’ebé belit ho susesu, tanba nia iha kontratu ida ho legal no metin ho órgaun soberanu estadu Timor-Leste.

Entrevista ho Timor Post realiza tinan kotuk iha ninia espasu (eskritóriu) foun iha area Vila Verde besik ho aredor Katedrál Dili, iha Novembru 2022, Litha haktuir kona ba ninia família, simplesmente  habadak de’it istória katak nia iha família ida antes ho domin sira harii tiha, ikus mai sira fahe malu (separadu), Oras ne’e Litha hela ho ninia oan sira de’it.

Maski ohin loron susesu, Litha mós liu hosi esperiénsia moruk barak. Uluk nia servisu hanesan lojístika iha ofisina (Bengkel) A1 Service ho rendimentu mensal 120 USD.

Nia sita lia fuan motivasaun sira katak “Koko hodi halo negósiu tuir saida maka sente no haree.  Ita la hatene ita ninia futuru oinsá?  ita hala’o de’it saida maka iha ita ninia oin no koko atu aprende beibeik”.

Hakfodak No Admira

Komesa hosi tinan 2014, Joven barak uza telemovel hodi publika foto no hakerek lia fuan oi oin inklui de’it publika video ne’ebé so para diverte an no la hamosu valor balun, kontráriu ho Litha; Nia hahú asesu Facebook asesu ema ninia Gallery Foto (galeria imajen sira)  hosi Naran Gallery motiva nia aumenta tan naran Litha ikus mai sai naran ba empreza indústria Hand Made (mão de obra) Litha Gallery hodi hahú negósiu utiliza rede internet hodi fan ninia produtu.

Lee Mós :
Turista 300 Vizita Timor-Leste durante oras Lima

Nia sei lembra, ninia kliente dahuluk ne’ebé sosa ninia produtu, ema ne’e naran Sr. Joni Caliente atuál funsionáriu públiku ida iha instituisaun estadu nian.

“Ha’u la hatene nia gosta ka lae? tanba iha momentu ne’ebá ha’u nia produtu sei natural loss no ha’u agradese to agora nia sai nafatin ha’u nia kliente, no ema barak sempre mai husu , se maka ema dahuluk ne’ebé sosa ha’u nia produtu” Litha sei lembra ninia kliente dahuluk ne’e. Ate foto hosi produtu dahuluk ne’ebé nia fan, sei rekorda nafatin liu hosi foto atu lembra nafatin nia iha ninia ezisténsia negósiu hosi loron ne’ebé nia hahú ba dala uluk nian.

Iha 2022, iha kalan ida kuaze tuku sia (la lembra data fixu), Litha hakfodak tanba produtu prenda Litha Gallery ne’ebé halo hosi tais Timor no ornamentu balun tuku ho osan mutin tama nasaun Vatikanu no simu hela hosi ema katóliku númeru un iha mundu Papa Francisco I. atuál Xefe Estadu Vatikanu. Afinál Papa Francisco ho naran kompletu Mario Bergoglio, orijen hosi Argentina ne’e simu hela prenda hosi ninia omólogu, ita ninia Prezidente Repúblika Jose Ramos Horta.

Esperiénsia moruk

Ko’alia kona ba susesu la sees hosi dezafiu, provérbiu autór deskoñesidu ida hatete “Qum todo qer, todo perde” katak hakarak se maka hakarak buat hotu bele lakon buat hotu ne’ebé nia hakarak. Provérbiu ne’e sai realidade iha Litha ninia moris.

Litha rasik rekoñese hodi afirma “Momen terburuk adalah pelajaran yang paling berharga, katak esperiénsia ida ne’ebé teb tebes bele sai lisaun ho valór boot”.

“Ha’u halo ema nia ropa sala, depois ema hakilar ha’u, ha’u moe loos. Ha’u sei koñese to agora, ha’u husu deskulpa no ami amizade di’ak”, Litha Rekoñese hodi konfesa katak momentu ne’ebá (iha 2021) simu kliente barak, hafodak ho simu pedidu barak ikus mai nia la halo hotu servisu,  ikus mai simu mós lia fuan mal balun nian iha Facebook.

Lee Mós :
AMDIL Presiza Asegura Ema ho Moras Mental

Xamada Milagre

Iha 26 Abríl 2022 nu’udar loron sorte di’ak nian, Litha ninia telemovel lian, afinál hetan Call (Xamada-red). Nia mós atende telefone ne’e. “Ami hakarak ita asina kontratu ho ita” haktuir Litha katak Xamada refere mai hosi órgaun soberania númeru iha Timor-Leste.

Ai… ne’e tebes ka?”, hatán ho duvida hosi Litha hodi responde  ba ofisial aprovizionamentu Palásiu prezidensiál Ai-tarak-laran nian. Ikus mai Litha Gallery mós hetan oportunidade hodi tuir konkursu (tender) ne hetan eskolla hodi fornese nesesidade prenda ba bainaka sira Prezidente Repúblika nian ho durasaun ba tinan lima, hosi 2022-2027.

To iha data entrevista ne’e iha Novembru Tinan kotuk, Litha gallery submete ona obra liu 600. Sura iha hosi fulan Maiu 2022, imajina Timor-Leste hetan vizita bainaka espesiál hosi Portugal, viajen PR Horta nian ba Rai li’ur no simu banaka iha rai laran, Horta sempre fó prenda (lembransa) espesiál estadu Timor-Leste halo hosi produtu liman badaen Timoroan sira nian rasik hosi Litha Gallery.

Obra no Produtu

Litha oras ne’e haboot ninia negósiu hodi akomoda ema barak, hahú hosi sidade Dili no to iha area urbana no remotas, hodi akomoda pesoál suku roupa, joven Fashion modeling (estilista), joven no inan feton sira sour tais, inklui badaen tuku belak no kaebebuk inklui ornamentu sira seluk.

Uluk, Litha okupa espasu ki’ik loos iha besik Igreja Balide nian, sai hanesan fatin servisu nian hodi konsentra ninia negósiu. Hafoin muda ba kuartu boot uitoan besik iha loja konstrusaun Ponte My Friend ninia sorin. Mudansa sempre akontese ikus ne’e nia okupa ona uma tomak ida iha area Vila Verde sai sentru ba ninia negósiu.

Litha Gallery oras nee dezenvolve liu indústria tais, haree oinsá inan-feton sira soru tais sira ninia obra matéria prima , matéria báziku hosi tais.  Hola inisiativa halo ropa modelu kontemporánea (kahur) roupa ne’ebé ema bele uza ba servisu, no atividade seluk.

Kuandu tesi tais hodi suku roupa ida , maka matéria prima hanesan tais ninia restu ka rohan barak, “Do que soe, ami kria fila fali souvenir” utiliza fila fali tasi restu sira ne halo kaixa tau prenda sira nee , benefísiu hosi tais hetan ninia valor barak los. Sai produtu “Brand” roupa nia no  souvenir. Hosi asaun sira nee dudu daudauk merkadu ekonomia iha rai laran la’o.

Lee Mós :
Evita Krime Iha Dili, PNTL Sei Monta CCTV Iha Fatin Risku

“Ita la’ós atu duni riku, maibé ita bele fó benefísiu ba malu…Ha’u bele dehan, fó servisu ba ema barak ona Joven sira iha talentu barak maibé sira laiha oportunidade”, Litha afirma ninia produtu mai hosi servisu ida integradu, tanba ninia produtu iha siklu boot mai hosi inan feton sira soru tais, ekipa produsaun ba souvenir, no model Agency akomoda ema ho númeru boot uitoan.

Uluk servisu ba ema ninia empreza, Litha simu de’it rendimentu mensal 120 USD, maibé agora ninia negósiu  bele dehan kada-fulan, hetan menus hosi 3000/4000 USD. Maibé ladauk inklui produtu sira ne’ebé fornese ba Palásiu Prezidensiál. Tanba iha order (pedidiu)   Produtu Litha gallery la’o tuir de’it kustu operasionál, kustu barak presu mós aumenta, kustu uitoan presu mós uitoan. Iha presu mínimu 50 USD, másimu bele liu 10.000 USD. No mos prenda espesiál sira kada ida bele kona kustu 20.000 USD.

Esperansa Ba Futuru

Litha ninia Mehi katak marka ka Brand “Litha gallery” sei sai brand boot iha internasionál, kompete iha merkadu internasionál iha mundu Fashion.

“Ha’u lakohi halo ha’u nia matenek nee monu ba rai. maibé ha’u hakerek investe ba ema seluk mós. Iha mehi atu fó formasaun ba ema seluk hodi kontinua eziste hodi haboot obra Litha gallery iha futuru” nia hakotu ninia Istória.

Iha tinan barak hala’o servisu hanesan designer, rohan hosi tinan 2021, Litha organiza Litha Gallery Fashion Show dahuluk iha Benfica Dili, hosi ne’ebé ninia atividade ne’e hetan partisipasaun másimu ho model (estilista isra) no hetan resposta di’ak hosi merkadu. Litha Gallery mós hetan ona Icon na’in 10, no tinan tinan kontinua hetan ema foun sira.

To oras ne’e Litha Gallery prienxe ona konvite internasionál rua Ida, partisipa ona atividade Thailand Fashion Week iha Novembru 2022, no tinan ida ne’e Litha simu tan konvite hodi ba partisipa atividade Fashion nian hosi Turkia.(Reportajen Augusto Sarmento)

 1,823 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Litha Esforsu Hosi Zero, Simu Xamada Milagre He…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No