(Reportájen Rosa Garçia)
Kazu pandemia Covid-19 no kalamidade foin lalais, dada ema barak nia atensaun, inklui artista Timoroan ida iha Englatera, Dalia Kiakilir, nia sentidu solidariedade ba maluk Timoroan sira nia moris, halo nia to’o hakerek múzika ho titlu “Ami Hakarak avo Nana” ne’ebé fó sai ona iha nia Youtube hodi reflete kondisaun real iha rai laran.
Ba Timor Post via Whats App (WA), Timoroan ne’ebé moris iha tinan 1981, maibé boot iha Portugal, dezde tinan 1984 (iha tempu okupasaun Indonezia) hamutuk ho nia inan no aman, hafoin hetan ajuda hosi Cruz Vermelha sira ba hela iha Portugal to’o agora, hatete múzika nia titulu kona-ba Ami hakartak Avo Nana maibé konteúdu reflete ba realidade moris povu nian liga ba ukun na’in.
“Múzika ne’e nia títulu “Ami Hakarak Avô Nana” maibé nia konteúdu rasik reflete ba realidade povu nia moris agora daudaun, liga ba ukun na’in governu. Povu vs Governu. Ha’u foti títulu ne’e tanba ha’u nia laran taridu bainhira assiste ita nia funu na’in no agora atuál Primeiru Ministru Taur Matan Ruak, vizita aldeia afetadu ba kauza desastre natural no rona ema sira hakilar “Ami Presiza Avo Nana mak mai”. Mai ha’u triste, tanba maun Taur mós funu na’in ida, loloos povu respeitu nia nu’udar lider istóriku. Maibé ikus ha’u kompriende katak tanba lala’ok polítiku infelizmente deklarasaun balun kontroversial ho povu nia sentimemtu iha tempu susar, tanba estadu emerjénsia”, afirma tan oan feto hosi Carlos Agostinho ho Mara do Socorro Agostinho ne’e.
Durante ne’e Dalia sintuniza situasaun rai laran liu hosi kanál sira ne’ebé iha hanesan, RTTL, GMNTV, inklui Jornal ofisiail Timor-Leste nian, hanesan STL, Timor Post, INDEPENDENTE, TATOLI sira no agensia LUSA meius online ne’ebé disponivel.
Relasiona ho situasaun rai laran, Dalia sujere ba governu atu hadi’a sistema saúde, halo teste periódiku.
“Sujere ba Governu hadi’a sistema saúde iha ita nia rain ho rigorozu hodi hatan di’ak liu tan ba pandemia ne’e, kontrola nafatin fronteira, maibé labele labele taka total, nafatin kontrola hodi foti track reccord husi ema sira ne’ebé ne’ebé vulneravel (ema sira ho istóriku moras kroniku ruma ou idozos ferik katuas sira), hodi halo teste periodiku hodi bele deteta no atende ho diak”, nia rekomenda.
Hanesan sidadaun, Dalia mós lahaluha husu ba povu Timor-Leste hodi kumpre nafatin regra prtokoloer ne’ebé iha.
“Ha’u nia mensajen ba maluk doben sira hotu iha Timor ne’ebé mak susar hela, tanba situasaun agora la permite sira sustenta sira nia família, pasiensia no kalma, kumpri nafatin regra (Safety distance no usa mascara), atu nune’e labele risku da’et moras ne’e, kuidadu-an nafatin ho fé forte, reza nafatin ba maromak. Husu nai Maromak nia tulun hodi loke nai ulun sira nia néon hodi bele rezolve situasaun ne’e nune’e moris fila ba normal, nune’e ema ida ida bele hetan servisu hodi tau matan ba família”, afirma tan produtór iha UK no Estadus Unidos da Ameirka ne’e.(Lee notísia seluk iha Timor Post)
1,249 total views, 6 views today
