Isabel Iha Esperansa “Povu Halo Desizaun Ne’ebé Loos”

by -309 views
kandidata Prezidente numeru sorteiu 1 Isabel Ferreira fo votu iha sentru ensinu baziku filial Metiaut, (Foto Timor Post Jeremias Soares)

Reportajen: Jeremias Soares/editor Augusto Sarmento

DILI-kandidata Prezidente Repúblika ba períodu 2022-2027 ho númeru sorteiu-1 Isabel Ferreira ne’ebé akompaña husi kaben Primeiru Ministru Taur Matan Ruak ezerse ona votu iha sentru votasaun Sede Suku Metiaut.

Primeiru Ministru Taur Matan Rua ho Espoza to iha sentru oras 11:00, no iha minutu neen nia laran hodi ezerse sira-nia diretu votu nu’udar sidadaun.

“Ha’u espera Povu Timor-Leste halo desizaun ne’ebé los no di’ak, atu eskolla Prézidente ida ke hadomi Povu, atu tau matan ba Povu no Rai Ida ne’e, para bele liberta Povu husi terus no ki’ak”, Isabel informa ba jornalista sira iha sentru votasaun Ensinu Báziku Filial Metiaut, Sábadu (19/03).

Isabel hatete, rezultadu saída de’it mak mosu iha eleisaun ne’e, timoroan hothotu tenke simu.

“Ba ha’u defende ba Povu nia eskolla, se ha’u eleitu, ha’u hakarak Prezidente ida mais prósimu, Prezidente ida besik Povu no hamutuk ho Povu ki’ak sira, atu ajuda sira sai husi terus no ki’ak, liuliu ajuda sira nia oan sira atu hetan oportunidade ba eskola no empregu, tanba eskola no matenek bele muda sira-nia vida, muda família no muda nasaun”. Isabel dehan.

Entretantu, total votante iha Suku Metiaut hamutuk 1309. Suku Meti-Aut iha sentru votasaun rua, hanesan Sede Suku Meti-Aut no Ensinu Baziku Filial Meti-Aut.

Iha prosesu votasaun ne’e, observa direta husi observadór internasionál hanesan CPLP, Uniaun Europeia, IRI no observadór nasionál sira, inklui observadór kada kandidatu no fiskais sira. Sentru votasaun rua ne’e, hetan seguransa másimu husi PNTL. Situasaun iha suku Metiaut iha ambiente hakmatek.(*)

No More Posts Available.

No more pages to load.