Isabel Ferreira nia Resposta Kona-ba Kandidatura ba PR

by -837 views
Isabel da Costa Ferreira

Jornalista Jaime Pires / Editór Noémio Falcão

DILI (Timor Post)—Espoza Primeiru Ministru Taur Matan Ruak, Isabel da Costa Ferreira liuhusi Grupu Juventude ida husi Rejiaun Administrativu Espesial Oe-Kusi Ambenu (RAEOA) konfirma seidauk deside kandidatura ba Prezidente Repúblika periodu 2022-2027.

Koordenador Juventude RAEOA, Ozório Martins Suni liuhusi konferénsia ba imprensa, iha Restaurante Benfica, Segunda (23/08/2021) haktuir, atualmente Isabel sei iha hela Portugal, maibé sira fiar metin katak bainhira fila mai Dili deklara nia kandidatura.

“Ami halo ona aprosimasun ka konfirma ona ho nia katak, nia seidauk hatan sim ou não maibé kuandu nia fila husi Portugál mak média sira bele konfirma direita,” Ozório hatete.

Nia dehan, razaun sira apoiu Isabel Ferreira atu kandidata-an tanba, hanesan futuru rai ida ne’e nia sira konsiete kostume aat liu iha Timor mak kultura vingativa hodi hamosu problema iha setor sosiál, sira hanoin ema ne’ebé mak atu mai kandidatu an ba Prizidente Repúblika tenke mai ho independente no tenke feto.

Nia mós subliña, hanesan kandidatu independente, Isabel da Costa Ferreira hanesan feto ne’ebé iha kapasidade atu asegura unidade nasionál no konstituisaun RDTL hodi lori hikas Timoroan ba prosperidade.

Tanba Isabel Ferreira iha esperiénsia pasadu hanesan ema ativista ida ne’ebé dezde uluk luta maka’as ba direitu humanu, no nia iha kapasidade atu responsabiliza funsaun hotu ne’ebé nia kandidatu an ba hanesan Prezidente Repúblika.

“Ami Juventude mós hanoin Izabel da Costa Ferreira mai ho personalidade no karakter ne’ebé nakonu ho valor sira hanesan, solidaridade, karidade, onestidade, tolerante, moris ho domin paz no seluk tan”, tenik Nia.

Ho ida ne’e, sira husu ba Juventude sira hotu iha Munisípiu (13) mai hamutuk apoiu ba Izabel da Costa Ferreira hodi kandidatu an ba Prezidente Repúblika tinan 2022 nia mai.

No More Posts Available.

No more pages to load.