IOM Entrega Mákina Detetor Dokumentu Falsu ba Governu

by -369 views
Foto TP: Jaime Pires

Jornalista Jaime Pires / Editór Noémio Falcão

DILI (Timor Post)—Organizasaun Internasionál ba Imigrasaun  (IOM/International Organization for Migration) entrega mákina detetor hanaran Verifier Travel Document and Bearer (TD&B) ba governu liuhusi Ministeriu Interior.

Mákina detetor ne’e IOM entrega unidade tolu atu monta iha Aeroportu Internasionál Nicolau Lobato, Dili; iha Fronteira Mota-Ain no Sakato.

Hafoin serimónia entrega iha Otél Novo Turismo Dili, Segunda (25/10/2021), ba Jornalista sira Vise Ministru Interior, António Armindo subliña, Timor Leste presiza duni fasilidade sira atu deteta rede mafia sira iha liña fronteira no odamatan boot sira ema tama-sai territóriu.

Tanba ne’e, governante ne’e dehan, ho mákina detetor ne’ebé iha hametin liu tan kapasidade jestaun iha fronteira.

“Ho instalasaun Verifier TD&B foun ne’e, Timór-Leste sei koloka nia-an di’akliu ba hatán dezafíu sira be aumenta beibeik entermus fraude dokumentu viajen no identidade, bazeia ba análiza trends rejionál no nasionál, atu dezenvolve respostas jestaun fronteira ne’ebé operasionál bazeia ba intelijénsia,” António subliña.

Fraude dokumentu viajen no identidade nu’udar modus operandi ida ne’ebé ema uza iha tráfiku umanu, kontrabandu migrante no forma sira seluk krime organizadu transnasionál.

Verifier TD&B nu’udar ferramenta inspesaun sekundária automatizada ida ne’ebé trasadu atu tulun ofisiál imigrasaun sira iha pontu entrada halo ezaminasaun dokumentu no verifikasaun identidade.

Verifier TD&B ne’e mós interoperável ho bazedadus Stolen and Lost Travel Documents (SLTD) INTERPOL nian, ne’ebé bele verifika dokumentu viajen dijitalizadu sira hasoru dokumentu sira ne’ebé grava iha sistema. Sistema ne’e mós oferese asesu ba análize trend sira nasionál no rejionál bazeia ba dadus naun-sensitivu, ne’ebé bele eleva liután jestaun migrasaun atravesde aumenta paíz nia kapasidade atu deteta dokumentu viajen falsu no posível impostór sira iha fronteira.

Iha  sorin seluk, Xefe Misaun IOM, Ihma Shareef hatete, IOM sei kontinua tulun governu ba hametin jestaun fronteira iha Timór-Leste.

“Ami sei firmi nafatin hodi kontinua apoiu nafatin governanu Timor-Leste hodi hametin jestaun iha area fronteira ninia, nune’e mós area sira seluk tan,” tenik nia.

Ekipamentu Verifier TD&B, no atividade kapasitasaun no formasaun relasionadu nu’udar projetu  kontinuu ida ne’ebé apoia hosi Fundu Dezenvolvimentu IOM nian iha Timór-Leste, ne’ebé  projetadu atu hametin jestaun migrasaun no fronteira iha paíz ne’e.

No More Posts Available.

No more pages to load.