IOB Asina Akordu ho Universidade Warmadewa Bali

by -430 views
Reitór Institutu Of Bussiness (IOB), Pedro Ximenes

(Reportajen Cardenio Alves/Editor Mateus da Cruz)

DILI (Timor Post)- Institute of Business (IOB) no Universidade Warmadewa, Bali, Indonézia, asina akordu kooperasaun iha área Turizmu. Objetivu hosi kooperasaun ne’e atu estudante no dosente sira hosi universidade rua bele halo peskiza no komparasaun kona-ba fatin turizmu iha nasaun rua.

Reitór IOB, Pedro Ximenes, hatete, iha asina akordu ida ne’e universidade rua sei halo programa troka dosente, ezemplu dosente hosi IOB bele ba hanorin iha universidade ne’ebá no hosi universidade Warmadewa bele haruka sira nia dosente mai hanorin iha IOB.

Alende ne’e estudante hosi IOB mós bele ba halo peskiza iha fatin ne’ebá no estudante sira hosi universidade ne’ebá bele mai halo peskiza iha fatin turizmu sira iha Timor Leste.

“planu halo peskiza husi IOB ho universidade Bali, ne’e haree liu ba planu turístiku, foka liu ba lokál, étika no kulturál nian ne’ebé liga ba kultura TL no Bali nian, akordu ne’e durasaun ba tinan haat Ita hein katak atividade Ida ne’e, bele ajuda universidade IOB ho Warmadewa Bali,” nia dehan iha Edifísiu IOB, Fomentu, tersa ne’e.

Nia hatete, iha tempu besik dosente na’in haat hosi Universidade Warmadewa sei mai iha IOB, durante iha Timor Leste dosente hirak ne’e sei  halo peskiza ba fatin turístiku sira iha TL.

“Ita la haree de’it ba governu, maibé nee sai planu instituisaun nian ne’ebé liga ba nesesidade nasaun no povu nian, oinsá mak Ita bele dezenvolve setór turizmu hodi lori benefísiu ba Ita Nia rain no povu Sira, no klaru katak Ida nee Lina husi governu ninian”, nia subliña.

Kooperasaun ne’ebé mak IOB ho Universidade Warmadewa Bali halo nia objetivu maka atu hadi’ak povu no naran nasaun TL nian, ba nasaun dezenvolvidu sira seluk hodi mai haree no vizita situasaun no kondisaun Timor Leste. (Lee notísia seluk iha jornál Timor Post/asesu YouTube Timor Post)

No More Posts Available.

No more pages to load.