Inundasaun Rezulta Ema Rihun Evakua, 27 Lakon Vida

by -99 views
Ministru Prezidénsia Konsellu Ministru (MPKM), Fidelis Leite Magalhaes

(Reportájem Jaime Pires/Editor Mariano Martins)

DILI (TIMOR POST) – Tanba inundasaun ne’ebé akontese iha loron Sabado to’o Dominggu, (3-4 Abril 2021), tuir dadus provizóriu ne’ebé rekolla husi munisipiu 13 katak, hamutuk ema rihun ba rihun evakua husi hela fatin. No ema nain 27 maka lakon sira nia vida.

“Dadus provizóriu hosi reuniaun inter ministerial nian relata katak, hamutuk ema nain 27 iha teritoriu Timor-Leste (TL) maka lakon sira nia vida. No ema maizu menus rihun Ualu maka evakua hosi hela fatin iha Kapitál Dili.”

Lia fuan hirak ne’e hateten hosi Ministru Prezidénsia Konsellu Ministru (MPKM), Fidelis Leite Magalhaes ba jornalista hafoin remata reuniaun inter ministeriál, iha Palasiu Governu, Segunda, (05/04/2021).

Nia esplika liutan, hafoin udan boot ne’ebé akontese simultaneamente kuaze iha territóriu TL ne’ebé fo impaktu ba bee sa’e no rai monu iha loron Dominggu, (04/04/2021) ne’e governu, sosiedade sivil, igreja no indivídu sira kontinua esforsu halo evakuasaun no apoiu emerjénsia ba komunidade vítima tantu iha Dili no mós iha munisípiu.

Katak Governante ne’e, iha Dili fatin evakuasaun hamutuk 12. Ema barak liu iha Salaun Don Bosco Comoro Dili. Total evakuante 2.447 ho família 500 resin. Iha Kaikoli ema nain 815 ho família 180. Iha Edifísiu Ministériu Finansas hamutuk família 656.

Katak Fidelis, iha Liceu 528. Cruz Vermella Formosa hamutuk ema na’in 30. INFORDEPE Família liu 120. Igreja Bidau família 35. Klínika Bairru Pité Família 6. No evakuante balun evakua ba Madre sira iha Balide. No balun seluk iha Serojas Komoro.

Tanba privizoriu katak porta voz governu ne’e, bele akontese mudansa tun no sa’e ba númeru total. Dala ruma komunidade balun fila hikas ba hela fatin, depende ba kondisaun. Governu foti desizaun kanalizasaun apoiu ba vítima sira. Sekretaria Estadu Protesaun Sivil (SEPS) maka sei hala’o.

“Ba parte hotu-hotu. Sidadaun hotu-hotu maka iha kbiit atu fó apoiu ba família sira ne’ebé maka lakon uma ka presiza apoiu emerjénsia sira favor ida hakbesik aan ba sekretáriu estadu protesaun sivil. Nune’e sira bele kanaliza ba hirak ne’ebé presiza iha momentu ida ne’e,” apela Fidelis.

Eis MRLAP ne’e hatutan governu mós autoriza ona na’in ba loza konstrusaun no restaurante atu halo sira ninia atividade hodi fa’an sira nia hahán no sasán ba komunidade sira bele hola maibé kumpre nafatin ba regra serka sanitáriu.

Alende ne’e Governu mós liuhosi Ministériu Obras Publikas orienta ona kompañia sira ne’ebé iha maki atu hadi’a dalan suru tahu no hadi’a baleta sira ne’ebé hetan estragus hosi inundasaun.

Fidelis mós hatutan Primeiru Ministru ninia agradesimentu ba entidade hotu-hotu ne’ebé fó ona apoiu halo kaman ona situasaun ne’ebé nasaun hasoru hanesan hosi Igreja, Komunidade sira no pesoál diplomátika sira no ema hotu-hotu nian atu hodi hakat liu situasaun kalamidade.

Iha fatin hanesan Sekretáriu Estadu Protesaun Civil (SEPS) Joaquim Gusmão, hateten ema nain 27 maka lakon vida, maibé númeru ne’e posibilidade bele aumenta tanba agora sira iha prosesu buka tuir.

“Ema sira lakon vida ne’e iha Munisípiu Dili de’it hamutuk (13) no hamutuk ho sira iha Munisípiu maka 27 mak lakon vid. Maibé dadus ne’e sei bele aumenta. Tanba, sei buka tuir hela”, hatete Gusmão.

Entretantu iha loron (4/4/2021) sai loron tristeza ba Timoroan hotu iha rai laran no rai li’ur tanba nasaun foin restaura nia independénsia iha tinan 2002 ne’e nia kapitál Dili nakfilak ba kór kameak hosi tahu no bee inundasaun nian.(***)

No More Posts Available.

No more pages to load.