DILI— Polísia United Kingdom (UK) Inglatera, kontinua buka tuir no kaer Timoroan ne’ebé tama UK ho ilegalmente, no uza pasaporte Timor hela iha UK hodi haruk fila mai Timor.
“Ha’u haree ita nia maluk sira mai ilegál, balu uza pasaporte timor mai iha ne’e Polísia loron-loron buka tuir ka’er sira ba prosesu, depois sei haruka fila hotu ba Timor”, Teopaldus de Jesus Baptista, nu’udar traballadór Timoroan ida iha Inglatera informa ba Timor Post via WhatsApp, Domingu, (19/11/2023)
Traballadór Timoroan iha Iglatera ne’e hatete, ho maluk Timoroan sira ne’ebé tama ilegálmente ka uza pasaporte Timor nian obriga tama iha Inglatera ne’e dalaruma defikulta servisu na’in timoroan sira, tanba Polísia Inglatera tama sai servisu fatin hodi husu tuir, nune’e dala-ruma sira tenke abandona servisu oras ida nia-laran hodi atende autoridade seguransa UK nian hodi aprezenta dokumentus legál sira.
“Agora ami sira ne’ebé dokumentu legál no servisu kle’ur ona ne’e mós afeta hotu tanba loron-loron Polísia mai husu ami-nia dokumentus entaun ami tenke husik hela ami-nia servisu oras ida, rua nia-laran atende Polísia ne’ebé mai cek ami-nia dokumentu”,Teopaldus, hatete.
Nia rasik la hatene númeru serteza Timoroan ne’ebé sei ilegál ka uza pasaporte Timor maibé kuaze fulan rua ba kotuk to’o agora Polísia tama sai kaer Timoroan lori ba prosesu.
“Ha’u ladún hatene ema na’in hira ona maka Polísia ka’er ona, maibé loron-loron Polísia ka’er ita-nia ema na’in ida, rua ba prosesu” tenik Traballadór.
Nia esplika, tuir informasaun ne’ebé Polísia UK nian fó sai ona katak, iha tempu badak traballadór ilegál no sira ne’ebé uza pasaporte nasaun ida-idak nian iha Inglatera sei deporta hotu ba ida-idak nia nasaun, tanba ne’e nia husu ba Timoroan atu labele obriga-an ba Inglatera ka Irlándia ho ilegál ka uza pasaporte Timor ho objetivu ba servisu, di’ak liu dokumentu legál iha tiha liman mak ba para ba servisu laiha defikuldades ruma.(*)
6,980 total views, 12 views today
Bele hare Video Seluk :
Subscribe to Timorpost
