Dili (timorpost.com)—Primeiru Ministru (PM) Kay Rala Xanana Gusmão ohin hala’o viajen servisu ba Repúblika Popular Xina hodi partisipa abertura eventu Asian Games 2023 ba dala-19 ne’ebé sei hala’o iha sidade Hangzhou Xina.
Iha vizita ne’e, Xefe Governu Xanana sei partisipa uluk iha abertura Asian Games ne’ebé sei lansa hosi Prezidente Repúblika Popular Xina, Ji Xinping iha loron 23 Setembru 2023.
Eventu desportu mundiál Asian Games 2023 ne’e partisipa hosi atleta ho modalidedade desportu rihun hosi nasaun oin-oin inklui Timor-Leste.
Xefe governu Kay Rala Xanana Gusmão sei hasoru malu ho Prezidente Repúblika Popular Xina, Ji Xinping hodi diskute kooperasaun bilateral rai rua.
Hafoin enkontru ho Xefe Estadu Xina, PM Xanana akompaña hosi embaixadór Timor-Leste ba Xina, Abrão Santos sei hasoru mós estudante timoroan sira ne’ebé hala’o estudu iha Xina.
Entretantu, governu Xina mós konvida atleta timoroan hamutuk ema na’in-58 ne’ebé reprezenta timor-leste hodi partisipa Asian Games 2023 ba dala-19 iha Hangzhou Xina.
Atleta timoroan 58 ne’e kompostu hosi feto 24 fahe ba atleta feto na’in ualu (8), ofisiál feto na’in-16 no mane na’in-34 ne’ebé mai hosi federasaun 10 hanesan, Tenis Meza, Atletizmu, Taekwondo, Karate-DO, Natasaun, Federasaun Tiru, Boxing, Federasaun Halterofelismo, Badminton no volleyball Praia.
Vizita Xefe Governu ba Xina akompaña direita hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas, Ministru Administrasaun Estatál, Tomas do Rosario Cabral, Ministru Juventude, Desportu no Arte Kultura, Ministru Planeamentu no Investimentu Estratéjika, Gastão Francisco de Sousa.
1,122 total views, 12 views today
Bele hare Video Seluk :
Subscribe to Timorpost
