DILI (timorpost.com) – Embaixadór Japaun iha Timor-Leste, Tetsuya Kimura, hatete polítika dezenvolvimentu liuhosi relasaun bilateral entre nasaun Japaun ho Timor-Leste (TL) sei sustentabiliza setór ekonomia iha rai laran.
“Ha’u mai hasoru Prezidente Parlamentu Nasionál (PPN), no entuziazmu Governu no Povu Japaun hodi fó asisténsia ba povu Timor-Leste iha tinan ruanulu (20) liubá, no kontinua ate agora,” nia hateten iha Parlamentu Nasionál, Kuarta (01/02).
Iha soru-mutu ne’e, nia dehan sira mós ko’alia liubá dokumentu ne’ebé fó akordu hosi JICA no Ministériu Finansas, kona-ba reabilitasaun terminal Aero-portu Internasionál Nicolau Lobato,
“Ami ko’alia mós interkámbiu ema nian, liuliu membru Parlamentu no povu sira iha baze, no technical meeting halo daudaun ona, entre Timor-Leste ho Governu Japaun, no espera sei fó akordu ba programa refere, hodi bele sustentabiliza liután setór ekonomia iha Timor-Leste”, nia subliña.
Nia hateten, husi technical meeting, sei fó akordu lalais ba programa refere, atu bele rekruta Timoroan sira ba servisu iha area agrikultura, hodi aumenta ekonomia iha rai laran.
Objetivu ida ne’e atu fó mós koñesimentu, esperiénsia teknolojia, Timoroan, hodi bele kapasita sira-nia mentalidade hodi mai investe no kontribui fali ba dezenvolvimentu ka setór ekonomia iha nasaun rasik.
“Ha’u hanoin Timor-Leste ho Japaun iha kores hanesan, kona-ba estadu demokrasia, no direitu umanu, entaun ne’e hanesan relasaun amizade no kooperasaun di’ak iha futuru, hodi mellora liután setór ekonomia iha Timor Leste”, nia hateten.
Ikus nia dehan, programa refere Governu Japaun sei lori Timoroan na’in-lima (5), ba servisu uluk liuliu iha area agrikultura no ida ne’e sai hanesan projetu pilotu ida, bainhira Governu konkorda ho desizaun ida ne’e sei rekruta Timoroan barak liután, no haluan liután area servisu nian.
1,837 total views, 6 views today
