Dili (timorpost.com) — Embaixada Australia hamutuk ho komunidade Australianu iha Timor-Leste hala’o eventu ida iha Timor Plaza iha loron 26 Janeiru hodi komemora Loron Australia nian “Australia day”.
Eventu Loron Australia nian iha tinan 2023 ne’e mai ho tema jerál mak “Reflesaun. Respeitu. Selebra”.
Loron Australia mak sai hanesan momentum espesiál ba povu Australianu sira iha ferias nasionál ida iha Australia. Iha eventu espesiál ida ne’e marka ho ferias komunidade no família, festival, serimónia no funsaun ofisiál sira iha Australia inklui iha Diaspora.
“Husi eventu Loron Australia tinan ida ne’e ita selebra atu oferese oportunidade ida atu rekoñese istória australianu sira ne’ebé importante liuhusi viajen nasionál inklui istória, tradisaun no kultura sira ne’ebé la’o hela husi Aboriginal no Torres Strait Islanders ba populasaun australianu modernu sira bele hatene”, hateten hosi Komunidade Imprensa, ne’ebé Timor Post asesu iha Sesta (27/01).
Tuir komunikadu ne’e mós hatete, iha momentum ida ne’e John Feakes hanesan membru Australian Charge d’Affaires, hatete Australia nia relasaun ho Timor-Leste metin tebes iha kualkér medida.
“Relasaun ho Timor-Leste, iha kualkér medida, mak Australia nia relasaun ne’ebé importante liu no ida ne’ebé ita-nia valór boot liu. Ne’e relasaun ida entre nasaun rua ne’ebé orgullu no independente. Entre parseiru rua ne’ebé hanesan”, nia hateten “Ita-nia relasaun mak akordu ho jeografia, maibé ne’e barak liu fali ida-ne’e”.
Nia hatutan, ida ne’e envolve ona ema hotu ho valor umanidade ne’ebé boot hanesan respeitu ba ema nia direitu, respeitu ba fiar, ba ema seluk nia hanoin, no kompromisu ba prosesu demokrátiku.
“Los katak iha relasaun sempre mosu kazu barak, ne’ebé kle’an liu iha ita-nia moris rasik, ne’ebé naruk ba tinan barak ona. Ida ne’e sempre iha”, nia afirma.
Australianu sira ne’ebé hela no vizita iha ne’e no Timoroan sira ne’ebé hela iha Australia no kontribui hodi halo Australia sai di’ak liu no forte liu, sira lori testemuña modernu ba ida-ne’e. nia agradese tebes ba ida ne’e.
“Iha Eventu espesiál loron australianu nian ida ne’e, atu hatete de’it katak ami la haluha ba sakrifísiu sira ne’ebé povu Timor-Leste halo iha Funu Mundial daruak nian hodi defende Australia. Ida ne’e hanesan tusan ida-ne’ebé australianu hotu lori inklui jerasaun australianu sira ne’ebé mai”, nia hateten.
Entretantu eventu ne’e rasik hetan partisipasaun husi Prezidente Repúblika Demokrátika Timor-Leste, Jose Ramos Horta, Prezidente Parlamentu Nasionál, Aniceto Guterres Lopes no membru parlamentár sira, Vise-Ministru Negósiu Estranjeiru no Kooperasaun, Julião da Silva, Xefe Forsa Defeza, Tenente Jenerál Falur Rate Laek, Komandante Jerál PNTL, Komisáriu Faustino da Costa, no membru sira husi VIII Governu Konstitusionál, membru korpu diplomátiku, komunidade emprezariál Australiana, parseiru dezenvolvimentu no konvidadu sira seluk.
2,281 total views, 3 views today
Bele hare Video Seluk :