DILI (timorpost.com) — Prezidente Repúblika (PR), José Ramos Horta, Segunda (05/12), simu karta Kredensiál husi Embaixadór Japaun ba Timor-Leste (TL), Kimura Tetsuya, iha Palásiu Prezidensiál, Bairru-Pité.
“Ohin Prezidente Repúblika, simu kredensiál husi Embaixadór foun Japaun nian iha Timor-Leste, Kimura Tetsuya, hodi substitui fali Embaixadór tuan,” Vise-Ministru Negósiu Estranjeiru no Kooperasaun (V-MNEK), Julião da Silva, hateten hafoin serimónia ne’e.
Nia dehan, Embaixadór Kimura nia la’ós foun, nia mai iha Timor-Leste ba daruak ona, ne’ebé uluk mai hanesan, funsionáriu diplomata embaixada Japaun nian iha Timor-Leste iha tinan 20 ba kotuk.
“Bainhira hahú ita-nia restaura independénsia, husi ne’e nia fila, agora nia mai hodi sai hanesan Xefe Misões nian ba Japaun iha Timor-Leste,” Julião esplika.
Nia haktuir, ohin iha simu karta kredénsial ne’e, iha diskusaun ho Xefe Estadu ko’alia kona-ba oinsá kooperasaun Bilaterál kontinua entre país rua Timor-Leste ho Japaun.
Nia hatutan, husi ne’e Prezidente Repúblika, mós aprezenta kestaun lubuk ida, ne’ebé la’o durante tinan 20 nia laran, au-mezmu tempu Xefe Estadu mós mensiona kona-ba kontinuasaun ba apoiu husi Governu Japaun ba dezenvolvimentu Ekonomia, dezenvolvimentu Greater Sunrise.
Alende ne’e Julião, afirma tan kona-ba Timor-Leste nia kontinuasaun ba serbisu nian, liuliu apoiu Timor-Leste nia adezaun ba ASEAN, ida ne’e mak ohin reuniaun kortezia husi Prezidente Repúblika ho Embaixadór Kimura Tetsuya.
Nia hateten, kona-ba kooperasaun ne’ebé la’o, hanesan durante ne’e ema hotu-hotu haree, ida agora husu atu kontinuasaun ba tinan oin, hodi bele hahú konstrusaun iha Aeroportu.
Julião haktuir, segundu kontinuasaun nafatin ho bolsa estudu ne’ebé durante ne’e hetan apoiu husi Governu Japaun através sira-nia ajénsia JAICA no mós apoiu husi serbisu agrikultura ho peska nian.
“Ajénsia privadu ka Setór Privadu husi Japaun atu apoiu ba dezenvolvimentu Greater Sunrise, ida ne’e mak ita-nia Prezidente Repúblika, mós husu atu kontinua nafatin kooperasaun ne’ebé eziste iha Timor”, nia hakotu.
1,793 total views, 3 views today
