DILI (timorpost.com) — Prezidente Repúblika (PR), José Ramos Horta, Kinta (17/11), simu audiénsia husi Ekipa Televizaun Australian Broadcasting Cooperation (ABC), hodi ko’alia kona-ba akórdu kooperasaun ne’ebé estabelese ona ho Média sira iha Timor-Leste.
Prezidente Konsellu Administrasaun Rádiu no Televizaun Timor-Leste, Empreza Públika (RTTL-EP) José António Belo ‘Taraleu’ ne’ebé partisipa mós iha enkontru ne’e, hatete Televizaun ABC hakarak materializa kooperasaun ho RTTL no Média sira iha Timor.
“Ohin kolega sira mai informa ba Prezidente Repúblika, saida mak sira sei halo atu apóiu média sira iha Timor-Leste, liuliu ba RTTL relasiona ho memorandum entendimentu ne’ebé maka asina ona entre RTTL ho ABC kona-ba troka konteudu no hanorin English liuhusi televizaun,” Prezidente RTTL, José Belo hatete iha palásiu prezidensiál, Bairru-Pité.
Nia hatutan, RTTL ho televizaun ABC sei asina akórdu kooperasaun iha área formasaun no kapasitasaun lian Ingles ba média sira iha Timor-Leste, inklui harii seksaun lian Ingles iha RTTL.
Entretantu, Lead International Development Public Affairs, Jo Elsom, hatete enkontru ho Xefe Estadu ne’e ko’alia liu kona-ba importánsia média no liberdade ba mídia nian, tanba mídia broadcasters nasionál nia papél mak promove interese públiku nian no mós apóiu sidadaun sira atu asesu ba informasaun.
“Ami agradese tebes ho Prezidente. Ami ko’alia liga ba dezenvolvimentu média nian no oinsá atu serbisu hamutuk média iha Timor hodi harii kapasidade no “skill” ho matenek ne’ebé ami iha no mós ami sei aprende buat balun husi média iha Timor, nune’e bele kria relasaun iha lian jornalizmu,” Jo tenik.
Jo Elsom mós agradese ba Prezidente Repúblika, José Ramos Horta, bele disponibiliza nia tempu hodi hasoru malu no sira husi televizaun ABC.
3,106 total views, 3 views today
Bele hare Video Seluk :