DILI (timorpost.com) — Prezidente Repúblika (PR), José Ramos Horta, hatete sidadaun Timorense ne’ebé hakarak buka oportunidade ba serbisu iha Rai li’ur ne’e ida-idak nia diretu, maibé labele liuhusi Ajénsia sira ne’ebé la koñese.
“Ha’u apela ba joven sira katak, sé mak hakarak buka oportunidade ba serbisu iha Rai Li’ur, ne’e ida-idak nia diretu tanba rai ida ne’e livre, demokrátiku,” Xefe Estadu hateten hafoin fila husi Portugál iha salaun VIP Aeroportu Komoro, Domingu (06/11).
PR Horta aumenta, atu hetan pasaporte Úniku, hetan osan uitoan atu selu passaporte ne’e, selu billete, laiha tan kontrolu seluk, difikuldade seluk.
“Buka tau naran atu ba Korea nian, estuda língua Koreano, buka tau naran atu ba Austrália nian husi programa rua ne’e mak programa ofisiál, ida ne’e iha protesaun kompletu iha Korea no Austrália,” Xefe Estadu afirma.
Tanba ne’e, sé mak hakarak ba Europa, hanesan hotu-hotu hatene ona, labele liuhusi Ajénsia sira ne’ebé imi la koñese.
La’ós iha tinan ida ne’e de’it, maibé iha tinan lubuk ida nia laran, bosok joven sira lubuk ida katak, atu fó osan halo empresta ho nia funan todan teb-tebes ne’e konsideradu illegál.
“Nune’e la’ós agora de’it, maibé iha tinan lubuk ida nia laran, vítima lubuk ida mai ko’alia ho ha’u rasik, sira husu emprestimu dólar amerikanu rihun 3 kada ema ida ba ema seluk,” PR Horta akresenta.
Xefe Estadu subliña, ho ida ne’e la to’o tinan ida, tenke selu to’o kedan dólar amerikanu rihun 10, tanba husi dólar amerikanu rihun 3, sa’e to’o rihun 9 ou 10, ne’e illegál.
Tanba ne’e, se joven sira husu osan, kuandu laiha kbiit atu selu, la selu, nune’e sé mak lakon, husi ema ne’ebé lohi joven sira ne’e mak lakon tan, tanba sira mak halo aktu ida ne’ebé illegál ho ezije porsentu 30, 50 no balu 100 tan.
Ne’e duni PSIK ho PNTL nia serbisu mak ne’e, buka elementu ne’ebé responsavel ba situasaun ida ne’e.
“Ha’u-nia apelu dala ida tan ba joven sira, hela hakmatek kuandu sei iha prosesu atu hetan nasionálidade Portugés, Autoridade portugeza sira sei haree hodi kompriende, atu sira bele buka oinsá hodi prosesu tuir regra sira nian ou Uniaun Europeia tomak,” PR Horta hakotu.
3,832 total views, 3 views today
Bele hare Video Seluk :
Subscribe to Timorpost
