DILI (timorpost.com) – Misaun Koordenadór Nasoins Unidas (UN), Roy Trivedy, remata ona iha Timor-Leste, maibé kompromete sei kontinua apoiu timoroan sira ne’ebé iha United Kingdom (UK).
Nia hatete, misaun iha Timor-Leste remata ona, no sei fila fali iha semana ne’e nia laran, maibé sei kontinua apoiu timoroan sira barak ne’ebé agora iha UK.
“Ha’u ohin mai halo despedida formál ho Primeiru Ministru, ha’u fó agradesimentu ba nia tanba apoiu ha’u-nia servisu durante tinan lima, hahú husi 2018 to’o 2022”, nia hateten iha Rezidénsia Xefe Governu, Faról, Tersa (11/10).
Nia dehan, nia parte sente triste tanba tenke husik Timor-Leste, tanba durante nia mandatu nia halo memória barak iha Timor-Leste, no hetan priviléjiu husi povu Timor-Leste ba nia ho nia família tomak durante tinan haat.
“Tanba ne’e ha’u sei ba servisu fali iha UK, no ha’u sei la haluha kontinua apoiu nafatin timoroan sira barak ne’ebé agora hela iha UK, no sei ajuda nafatin Timor-Leste, tamba ha’u hadomi Timor-Leste no sei iha ha’u-nia fuan nafatin,” hateten nia.
Nia haktuir, tinan lima nia konsege halo vizita ba povu Timor-Leste iha munisípiu sira hotu, maibé povu Timor-Leste sempre simu ho di’ak, tanba ne’e mak nia konsidera nia an hetan priviléjiu tebes husi Povu Timor-Leste no lider sira hotu.
“Ha’u durante servisu ba UN hodi ba serbí nasaun barak, durante tinan 20 ha’u serbí nasaun hamutuk (32), no ohin ikus iha Timor-Leste, maibé nasaun ne’ebé ha’u hetan priviléjiu liu mak Timor-Leste,” hateten nia.
Ho ida ne’e nia husu ba Primeiru Ministru, no lider sira hotu kontinua mantein pás no prosperidade iha rai ida ne’e, kontinua kria infraestrutura no hadi’a nafatin setór edukasaun, saúde, Bee moos no Eletrisidade sira.
Nia reforsa, durante nia hahú mandatu iha tinan 2018, nia mai Timor-Leste, situasaun polítika iha rai laran la’o ladún estavel maibé povu Timor-Leste hamutuk ho Governu no órgaun soberanu sira seluk simu nia ho di’ak to’o susesu iha Timor-Leste.
Atu hakotu nia dehan, ba ema ida ne’ebé atu troka nia mai fali ne’e señora ida, sei to’o iha Timor-Leste iha fulan Novembru, tanba daudaun ne’e nia sei servisu ba ONU iha Nova-Iorke hela.
2,021 total views, 3 views today
Bele hare Video Seluk :