DILI (Timor Post) – Xefe Governu Timor Leste, Taur Matan Ruak ho Ministra Negósiu Estranjeiru no Kooperasaun Australia, Ministra Negósiu Estranjeiru hosi Austrália, Penny Wong, hasoru malu hodi diskute relasaun bilaterál rai rua nian.
Ministra Negósiu Estranjeiru no Kooperasaun, Adaljiza Albertina Xavier Reis Magno, hatete iha soru-mutu ne’e, Primeiru Ministru (PM), Taur Matan Ruak, fó agradese ba Governu Austrália tanba durante tempu Covid-19 no inundasaun 04 Abríl, mós sira apoiu tebes Timor-Leste.
“Ohin ha’u ho Primeiru Ministru, Taur Matan Ruak, simu vizita traballu Ministra Negósiu Estranjeiru hosi Austrália, Penny Wong, akompaña hosi Embaixadór Austrália iha Dili, Bill Costello, hodi ko’alia kona-ba kooperasaun bilateral País rua ne’e nian,” nia dehan iha Palásiu Governu, Kuarta lokraik (31/08).
Ministra hatutan, durante enkontru, Primeiru Ministru, hato’o nia benvindu ba Ministra Penny Wong iha Timor-Leste, hodi hatutan relasaun no lasu amizade Timor-Leste ho Austrália ne’ebé hahú kedas iha Funu Mundiál daruak to’o ohin loron.
Nia subliña, kooperasaun bilaterál Dili ho Kamberra iha tinan 20 ikus ne’e hatudu signifikativu tebes no lori benefísiu barak liu ba Timor-Leste, liuliu iha tinan haat ikus ne’e, ne’ebé hatudu nivel kooperasaun sa’e, iha área oin-oin, hanesan defeza no seguransa, desentralizasaun, justisa, no iha área estratéjiku sira.
“Hanesan projetu espansaun ba Aeroportu Internasionál Prezidente Nicolau Lobato no projetu internet fibra ótika, inklui apoiu vasina ho númeru boot ba Timor-Leste durante períodu COVID-19, no apoiu ba dezastre naturais. Nune’e aproveita biban refere, Xefe Governu lori povu Timor-Leste nia naran atravesa Ministra Negósiu Estranjeiru, Penny Wong, agradese ba Primeiru Ministru, Anthony Albanese no povu australianu ba jestu apoiu no kooperasaun sira refere,” deklara nia.
Iha sorin seluk, Ministra Negósiu Estranjeiru, Penny Wong, dehan nia parte sente kontente bele hasoru malu ho Primeiru Ministru, no reteira Governu foun Austrália nia kometimentu ba kooperasaun sira iha área oi-oin.
“Sei kontinua apoiu infraestrutura Timor-Leste nian espesiál ba projetu espansaun Aeroportu Internasionál Prezidente Nicolau Lobato no projetu internet fibra Ótika,” hateten membru Governu Austrália ne’e.
Durante iha Dili, Ministra Penny Wong, hasoru malu mós ho Prezidente Repúblika, José Ramos Horta, nia omóloga, Ministra Adaljiza Magno, Ministru Finansas, Rui Gomes no entidade importante sira seluk.
2,101 total views, 3 views today
