DILI (Timor Post)- Parlamentu Nasional (PN), apoiu Xefe Estadu Timor Leste ho Repúlika Indonézia nian atu implementa planu sirkulasaun Bus Damri hosi terrestre Kupang-Dili.
Vise Prezidente PN, Maria Angélica Lopes Sarmento, hatete planu ida ne’e di’ak, tanbá bele fasilita povu Rai Rua nia movimentu.
“Inisiativa Xefe Estadu Timor-Leste ho Repúblika Indonézia, ko’alia ba asuntu movimentu terrestre, ne’ebé uza ho Bus Damri husi Dili ba Kupang, ne’e di’ak tebes,” Nia hateten iha PN, Segunda (01/08).
Nia dehan, Parlamentu Nasionál louva ho inisiativa ida ne’e, no benvindu ba Estadu rua ne’e nia apoiu tomak.
Planu hanesan transporte Bus Damri atu halai husi Dili ba Kupang, nune’e husi Parlamentu Nasionál fiar katak sei fó benefísiu di’ak ba povu no Estadu rua ne’e.
“Ita hatene Timor-Leste daudaun ne’e roda ekonomia lão ona, inklui atividade ekonómika ne’ebé hahú kedas iha fronteira terrestrial ne’ebé loke dalan ba sidadaun rua ne’e, bele atravesa fronteira ho livre,” nia sublina.
Nia dehan, Governu TL karik lori planu ida ne’e hodi kria kampu ba transporte públiku nian, liuliu transporte terrestre ho Bus Damri, planu ida ne’e mak aprova, hanesan órgaun Estadu nu’udar Parlamentu apresia ho desizaun ida ne’e.
Tanba bainhira sosa bus Damri ida ne’e, Governu TL mós hetan reseita, reseita doméstika bele hasae liu tan, naran katak Governu tenke iha kontrolu ne’ebé di’ak.
Nia apela, Governu presiza tau atensaun ba merkadu ka estasaun Bus Damri, tanba ne’e Parlamentu Nasionál, hanoin husi orsamentu jerál estadu hosi 2020/21. Ministériu Transporte presiza prevee kedas, atu bele hadi’a merkadu transporte ba Bus Damri nian.
Ikus Nia dehan, kondisaun ba fatin transporte nian mak presiza rezolve, no fiar planu sira sei ajuda mobilidade no movimentu ba populasaun sira husi fatin ida ba fatin seluk.
2,176 total views, 3 views today
Bele hare Video Seluk :