DILI (Timor Post)- Relasiona ho Timoroan sira ataka malu no sona malu iha ema nia Rai, Ministra Negósiu Estranjeiru no Kooperasaun (MNEK), Adaljiza Magno deklara kuidadu tanba Lei iha Inglaterra Rigorozu uitoan.
“Ha’u sente violénsia sempre ladi’ak, tanba ne’e ita apela ba maluk sira labele halo violénsia ba malu, tanba ema nia Lei iha Inglaterra ne’e rigorozu tebes,” nia hateten iha Faról, Kinta (28/07).
Nia dehan, kuandu sira ba buka servisu mak ba halo krime ba malu ema kaer sira, submete sira ba Tribunal no risku boot sira bele tama kadeia.
“Ha’u sente hotu-hotu tenke kuidadu no hatún nervozu no labele ódiu malu, atu nune’e ba iha ne’ebá karik ba buka servisu ka ba eskola, halo ita-nia objetivu ba labele buka problema,” deklara nia.
Nia subliña tan, tanba violénsia ne’e hotu-hotu hatene katak, ne’e laiha rezultadu ida ne’ebé di’ak ba ema, maibé nia rezultadu aat mak barak liu.
“Sidadaun sira ba servisu iha Inglaterra ne’e nia dadus konkretu laiha, tanba sira balun mai rejistu no sira balun la rejistu, tanba sira ba ne’e ho Pasaporte Portugál, maibé iha estimativu purvolta 15 ka 20 mill ital, maibé sira rejistu ne’e la liu 5 mill,” hateten nia.
Nia reforsa tan, maibé sira kuandu iha problema ona sira foun ba rejistu iha Embaixada, maibé iha buat hotu-hotu normál sira la ba rejistu, entaun sira-nia dadus konkretu laiha,” nia hakotu.
1,948 total views, 3 views today
Bele hare Video Seluk :