Jakarta (Timor-Post)- Lideransa Muhammadiyah Prof. Dr. K.H. Haedar Nashirh, apoiu Timor-Leste atu bele adere ba ASEAN (Association of Southeast Asian Nations).
“Indonézia ho Timor-Leste ne’ebé nu’udar nasaun maun-alin, iha relasaun kultura ne’ebé hanesan, Ami Muhammadiyah apoia tebes Timor-Leste atu sai lalais membru ASEAN, hanesan mós ho apoiu husi Indonézia liuhusi Prezidente Jokowi no Konsellu Reprezentativu Povu nian ne’ebé Prezidente mós hasoru ona ho sira”, Haedar Nashirh informa asuntu ne’e hafoin PR Horta vizita Kuartél Jerál Muhammadiyah.
Nia dehan, lideransa Muhammadiyah nian sente kontente tebes simu vizita ofisial husi Prezidente Repúblika Timor-Leste, José Ramos Horta, inklui Ministra Negósiu Estranjeiru ho delegasaun tomak, hodi hametin lasu amizade ne’ebé to’o ohin loron la’o hela.
Nia haktuir, Prezidente José Ramos Horta, nu’udar figura internasionál ida ne’ebé propoin Muhammadiyah no Nahdlatul Ulama, atu hetan Prémiu Nobel da Pas, maski prosesu ida ne’e kontinua la’o no seidauk bele simu tanba prosesu ne’e naruk.
“Ami lideransa sentrál husi Muhammadiyah dala ida tan hato’o ami-nia agradesimentu ba Prezidente Horta, tanba ita boot nia apoiu ne’ebé nunka remata”, nia afirma.
Nia dehan, Muhammadiyah ne’ebé envolve iha área edukasaun, saúde no umanidade, Prezidente Repúblika fó mós atensaun ba kestaun sira kona-ba pás no umanidade iha nivel global, atu nune’e Muhammadiyah bele kontinua aumenta kooperasaun nu’udar organizasaun naun-governamentál ho Governu Timor-Leste.
“Ami hein katak iha futuru ami mós bele loke sukursál ida iha Timor-Leste no loke instituisaun edukasaun ida, tan ne’e ami diskute ona katak ami-nia preokupasaun ho Prezidente mak oinsá valór umanu multi-kulturál, pluralizmu no moderasaun kontinua moris iha nasaun sira “, nia subliña.
Iha fatin hanesan, Xefe Estadu, José Ramos Horta, sente priviléjiu boot tebes hodi vizita lider Muhammadiyah iha kuartél jerál Muhammadiyah hodi esplora liután kooperasaun ho Muhammadiyah no Nahdlatul Ulama, hodi ko’alia kona-ba oinsá Timor-Leste, Muhammadiyah, Nahdlatul Ulama bele hadi’a liután kooperasaun hodi hametin relasaun bilaterál iha área barak no promove mós fraternidade umana iha rejiaun no mundu.
“Antes ha’u nomeia Muhammadiyah no Nahdlatul Ulama atu bele hetan prémiu Nobel da Paz, prosesu ne’e la’o kleur ona i ha’u nomeia mós Muhammadiyah ho Nahdlatul Ulama atu bele simu Premiu Paz UNESCO nian, hodi promove Fraternidade Umanu. Organizasaun rua ne’e pozitivamente no normalmente influénsia iha indonézia, rejiaun no mundu”, PR Horta afirma.
1,622 total views, 3 views today
Bele hare Video Seluk :