DILI (Timor Post)-Aban Segunda-Feira (18/07) Prezidente Repúblika, José Manuel Ramos Horta, ho delegasaun hala’o vizita ba nasaun viziñu Indonézia ho aviaun CITILINK.
Tuir ajenda ne’ebé Timor Post, asesu husi Prezidensia Repúblika, katak iha loron Tersa 19 Juñu 2022, Xefe Estadu sei hasoru malu ho Prezidente Repúblika Indonézia, Joko Widodo. Hafoin remata enkontru. Iha oras 13:00 Xefe Estadu sei hasoru malu ho eis Prezidente Repúblika, Susilo Bambang Yudhoyono (SBY) iha rezidensia eis Prezidente SBY.
Iha Tersa loraik oras 16:00 Prezidente Repúblika, José Ramos Horta, sei hato’o palestra ba sivitas akademista no estudante sira iha Universidade Indonézia (UI).
Enkontru ho Intelektual no Journlista sira iha Hotel Menteng (Dinner Meeting) oras tuku 19:00. Iha loron Kuarta Feira (20/07), Xefe Estadu hala’o enkontru ho Pengurus Besar Nahdlatul Ulama (PBNU) organizasaun islam boot ida iha Indonézia, iha sekretariadu PBNU Lt.7 Ruang 702 Jl. Kramat Raya No. 164 Jakarta Pusat, 10430.
Hafoin remata enkontru ho PBNU, Xefe Estadu ho nia delegasaun sei hala’o enkontru ho organizasaun islam, Muhammadiyah iha Edifísiu Pusat Dakwah Muhammadiyah.
Iha Kuarta loraik ne’e Prezidente Republika, José Ramos Horta, sei hato’o palestra ba sivitas akademista no estudante sira iha Universidade Islam Indonézia (UIN). Aleinde ne’e mós iha loron ne’e kedan Xefe Estadu sei halo entrevista espesial ida husi KOMPAS TV, fatin entrevista sei hala’o iha Studio ka Hotel.
Hafoin Xefe Estadu remata nia palestra iha UIN, Xefe Estadu sei hato’o mós palestra iha Universidade Katólik ne’ebé organiza husi Asesor Prezidente Repúblika, Martino Gusmão iha (UK).
Iha Kinta Feira 21 Juñu 2022 oras tuku 08:00-12:30 sei enkontru ho Foreign Policy Community of Indonesia (FPCI) organiza husi Dino Patti Djalal.
Loron Sesta Feira 22 Juñu 2022 Xefe Estadu sei dezloka ba Provinsia Nusa Tenggara Timur, Indonezia.
Entretantu, delegasaun atu ba hamutuk ho Prezidente Repúblika husi Parte Governu nian mak Ministériu Negósiu Estranjeiru no Kooperasaun (MNEK), Ministériu Agrikultura no Peskas (MAP), Ministériu Turizmu, Komersiu no Indústria (MTKI), Parlamentu Nasionál reprezenta husi kada bankada asentu parlamentar. Reprezentante husi CCI-TL Oscar Lima no emprezariu nasional Abilio Araújo.
2,339 total views, 3 views today
Bele hare Video Seluk :