INSS La Kansela Subsídiu 60% ba Traballadór

by -70 views

Timor Post (28/07/2020)- Prezidente Konsellu Administrasaun Institutu Nasionál Seguransa Sosiál (INSS) Longuinhos Armando, hateten subsídiu 60% ba traballadora la kansela, maibé prosesu maka tarde tanba mekanizmu atribuisaun direta.

“Ita la kansela, pedidu sira (kompañia) mai ita nia atribui direita ba Traballadór, la’ós ba kompañia, tanba ne’e mak tarde uitoan”, Longuinhos hatán ba konfirmasaun jornalista sira iha biban hasoru malu iha Parlamentu Nasionál Tersa, (28/07).

Armando adianta atribui ba kompañia ne’e lalais liu kompara ho atribui direita ba Traballadór, maibé prosesu la’o nafatin.

“Tarde tanba prosesu avalia dokumentu, maibé atribui ne’e la’o nafatin. Agora daudauk kuaze 4 mil ital mak ita halo ona atribui ho osan kuaze $ 1.5 ital, depois iha domingu ida ne’e ita selu tan kuaze 2 mil ital, prosesu la’o nafatin”, nia esplika.

Entretantu Governu liuhosi Konsellu Ministru iha loron 22 fulan Abríl aprova dekretu lei ida prevee subsídiu estraordináriu atu selu traballadór 60% hosi saláriu durante períodu estadu emerjénsia tanba surtu corona virus (covid-19) iha Timor-Leste.(Jornalista: Jaime Pires)

No More Posts Available.

No more pages to load.