INSS Hasai Ona $4. 083. 740 Apoiu Dezempregu

by -154 views
Prezidente INSS, Longuinhos Armando

DILI (Timor Post)—Governu liuhusi Institutu Nasionál Seguransa Sosiál (INSS) konsege hasai ona $4. 083. 740.00 (millaun haat, rihun ualu nulu resin tolu, atus hitu haat nulu dolares amerikanu) ba apoiu dezempreg iha Timor-Leste.

“Pagamentu ba apoiu dezempregu ita la’o nafatin. Ate a data ita halo ona pagamentu ba apoiu ida ne’e osan ho montante dolar millaun haat, rihun ualu nulu resin tolu, atus hitu haat nulu dolares amerikanu, ba benefisiariu hamutuk  8.972,” Prezidente INSS, Longuinhos Armando informa ba Timor Post, iha nia kna’ar fatin Kaikoli Dili, Tersa-feira (31/08).

Nia esplika, ida ne’e kompostu husi traballador hamutuk 5.667, ho nia osan $3.146. 166.00, apoiu eletrisidade ba empregador hamutuk 203 ho nia osan $275. 235.00. Depois apoiu ba renda empreza sira hamutuk empreza 136, ho nia osan hamutuk $136. 733.00.

Kona-ba despenza kontritivu, nia dehan, hamutuk na’in 1.600 ho nia osan $274.195.00. ba fakultativu hanesan motorizta, kios hamutuk 1.364 ho nia osan $251.509.00.

Portantu, nia dehan, INSS la sura motorizta no kios hira maka hatama dokumentu. maibé durante ne’e rejistu INSS simu dokumentu kuaze rihun 15.

“Ami la sura tanba barak, dokumentu ne’ebé tama de’it besik rihun 15. Agora balu map ida de’it maibé iha laran kompana 5, entaun ita labele sura ema ida-ida,” nia katak.

Maibé, nia hateten, ba motorizta, kios inklui dezempregu tama ba INSS, agora INSS selu ona 1.364, restu sei iha nafatin tanba INSS verifika ona dokumentu 100 to’o 200 no haruka ona ba banku hodi halo pagamentu hela nune’e bele halo pagamentu dala ida.

Prezidente INSS ne’e hateten, ema ne’ebé mak dokumentu tama ona iha INSS, sei hetan hotu direitu maibé presiza atu pasiensia tanba sei la’o tuir ninia prosesu.

“Kuandu imi nia dokumentu tama ona iha ne’e, ami verifika, loos hotu mak ami haruka ba banku. Kuanda balu la loos ami sei telefone, ezemplu pagamentu primeiru depois halo re-pagamentu tanba iha ema na’in 92 INSS transfere ba banku, banku rejeita tanba sira nia konta mate tiha ona,” nia klarifika.

Depois de ida ne’e, INSS telefone ba ema sira ne’e para resolve kedas ho sira nia osan kuaze $3.440.00. Tanba ne’e, kuandu dokumentu tama ona, pasiensia hein tanba sei prosesu tuir dokumentu ne’ebé mak tama uluk.

Longuinhos afirma, INSS iha ninia tarjeitu to’o iha fulna Dezembru tinan ida ne’e INSS bele gasta ona osan millaun $26 resin ho nia benefisiu hamutuk rihun 20 resin.

“Ha’u hakarak hatete, katak osan ne’e governu nian maibe la’ós tanba osan governu nian be ita fahe de’it, tenke verifika,” nia katak. (ono)

No More Posts Available.

No more pages to load.