INCT Realiza Formasaun ba Dosente Peskizadór 36

by -11 views
Logo INCT, Foto: Google

DILI (Timor Post) Institutu Nasionál Siénsia no Teknolojia (INCT), realiza formasaun ba dosente peskizadór hamutuk 36 husi instituisaun ensinu superior 18.

Formasaun ida ne’e realiza ho objetivu atu hasa’e abilidade ba dosente peskizadór sira iha instituisaun ensinu superior Timor-Leste tanba durante ne’e dosente peskizadór sira ladún tuir formasaun ba hakerek proposta peskiza nian.

Durasaun tempu ba formasaun ne’e durante loron 5 hahú husi loron 5 to’o 9 fulan Jullu. Dosente sira ne’e mai husi instituisaun ensinu superior hamutuk 18, no kada instituisaun dosente peskizadór na’in-2 mak partisipa iha formasaun refere.

Formasaun ne’e liga liubá oinsá fó abilidade hakerek proposta peskiza. Atu oinsá hato’o tópiku proposta peskiza ba instituisaun ruma para sira bele atrai fó osan depois bele fó fali rezultadu ba sira hodi uza ba planu.

Formasaun ne’e INCT realiza tanba bazeia ba nesesidade. Tanba atu fó abilidade ba peskizadór sira, tenke bazeia ba nesesidade tinan-tinan, entaun INCT sei kontinua fó formasaun ba dosente sira.

Formasaun ne’e sei fahe ba parte tolu. Primeiru kona-ba metodolojia peskiza, segundu kona-ba hakerek proposta peskiza, no terseiru kona-ba oinsá iha abilidade hakerek artigu ida di’ak.

Tinan ida ne’e INCT fó tan projetu peskiza hamutuk 16 ba dosente sira iha area prioridade 5 mak hanesan area agrikultura, area ekonomia, area edukasaun, area saúde, no ikus mak area infraestrutura nian.

Iha tinan 2019 ami fó projetu peskiza 7 ba dosente sira atu halo peskiza. Iha tinan 2021 sira 16 projetu peskiza ba dosente sira, agora sira asina ona kontratu, halo hela korresaun de dadus.

Durasaun tempu ba peskiza ne’e durante tinan ida, maibé INCT husu para to’o fulan Dezembru tinan ida ne’e sira bele hatama ona. Tinan ida ne’e kada projetu proposta peskiza atribui osan $5 mill.

Formadór João Câncio Freitas, hatete mai iha ne’e atu fahe esperiénsia kona-ba oinsá mak atu hakerek proposta peskiza, maibé ida ne’e dosente sira-nia hahán loro-loron nian.

“Ha’u la mai hanorin sira, maibé ha’u mai hanesan refreshing fila fali nune’e bele fó oportunidade barak liu para ema bele aprezenta proposta peskiza ba governu, INCT inklui instituisaun akadémiku selu-seluk hodi ita fó sai rezultadu para lori benefísiu ba ita-nia rai,” nia hatete.

Nia hatete, dosente sira atu hatene kle’an kona-ba hakerek peskiza dalan ida mak INCT halo fó formasaun kontinua ba dosente sira. Tanba dosente iha Timor-Leste barak mak mestradu, doutoramentu uitoan de’it, entaun tenke fó formasaun.

“Ita hakarak ita-nia mestradu sira hotu-hotu hanorin iha universidade neineik tenke ba doutoramentu. Entaun doutoramentu ne’e tenke profisaun nafatin para ita bele implementa rejime de karreira ba dosente,” nia hatete.

Entretantu, dosente peskiza Universidade Dili (UNDIL), Atanásio Belo, hatete hanesan dosente konsidera formasaun hakerek proposta peskiza importante tanba durante dosente sira ladún tuir formasaun ida hodi aumenta sira-nia skill kona-ba hakerek peskiza.

“Ha’u haree formasaun ida ne’e importante tebes. Ida ne’e di’ak ba ami dosente hodi hasa’e tan koñesimentu ba métodu peskiza, hakerek peskiza tanba formasaun peskiza ne’e la’ós loron-loron,” nia dehan. (Lee Notísia Seluk iha Jornal Diáriu Timor Post)

No More Posts Available.

No more pages to load.