Inaugura Loja no Kafé Aroma Timor

by -392 views
Imajen ne'e hatudu husi karuk ba loos, Vise MTKI, Domingos Lopes Antunes, Embaixadór Portugal, José Pedro Machado, eis Prezidente Repúblika José Ramos Horta, inaugura loja no kafé Aroma Timor, iha Páteo, Tersa (28/09). Foto mídia MTKI

DILI (Timor Post)—Vise Ministru Komérsiu no Indústria, Domingos Lopes Antunes ho eis Prezidente Repúblika, José Ramos Horta hamutuk ho Embaixado Portugal iha Timor-Leste, José Pedro Machado, inaugura Loja no Kafé Aroma Timor, iha Páteo,Tersa (28/09).

Loja no kafé Aroma Timor, oferese produtu lokal no dosi no bebida sira ne’ebé halo hosi ingrediente lokal husi rai laran, hametin ligasaun entre area rural no urbana.

Vise Ministru Komérsiu no Indústria, Domingos Lopes Antunes apresia no agradese ba inisiativa ida ne’e hanesan edukasaun ida atu motiva joven sira hodi promove setór produtivu iha rai laran.

“Agradese no apresiasaun ba inisiativa ida ne’e, katak setór negósiu hahú loke hikas fó empregu ba joven sira, pro-eminente tebes iha períodu Covid-19 ne’ebé negósiu barak enfrenta difikuldade atu rekupera maibé loja no kafé hetan nia dalan ona,” Domingos hato’o ba jornalista sira hafoin serimonia inaugurasaun loja no kafé, iha Páteo-Dili, Tersa (28/09).

Nia hatutan, loja ne’e fó valor ba produtu lokál sira tanba sei uza no hola ingrediente husi agrikultór sira. Agora, MTKI iha inisiativa lubuk ida, liuliu liga ba negósiu sosiál no kadeia valor setór produtivu sira, tanba ne’e MTKI sei kontinua fó apoiu ba estabelesimentu komersiál sira hodi rekupera hikas ekonomia iha rai laran.

Entretantu, Laureadu Nobel da Paz, José Manuel Ramos Horta, konsidera ne’e hanesan edukativu ida ba Timoroan atu halo produtu lokál sira, ema Timor oan serbisu ho Japoneza apoiu husi Fundasaun Camoés no Embaixada Portugal, entaun Portugal oferese fatin ida ne’e, timor oan estabelese produtu lokál ho kualidade.

“Ita ko’alia kona-ba setór ekonomia, ne’e importante tebes. Ita uza konsumu produtu nasionál sira deskobre reseita oioin tanba iha fatin ida ne’e la’ós kafé de’it maibé iha produtu barak mak sira halo iha fatin refere,” nia dehan.

Horta dehan, ne’e oportunidade ne’ebé di’ak ba timor oan sira atu servisu, tanba halo kafé hanesan profisaun tékniku ida, la’ós baibain halo iha uma, ne’e barista ida sira treinu formasaun hetan diploma ba atividade ida ne’e.

“Ha’u haree Timor oan balun hala’o atividade la’ós iha ne’e de’it maibé fatin seluk iha Dili, sira iha inisiativa halo kafé tuir standard internasionál,” eis Prezidente Repúblika ne’e dehan.

Timoroan ne’ebé promove produtu lokál ne’e, Horta dehan, sira servisu iha Australia sai barista, prepara kafé, manán osan boot, dala ruma servisu iha loja ki’ik sira fasil maibé iha treinu formasaun no dedikasaun.

Karik iha futuru mak loke otél boot iha Timor, nia hatutan, presiza sira servisu iha Singapura, Australia. Servisu nafatin iha vista kafé ninian, la’ós ba kafé de’it maibé produtu hotu-hotu, atu konsumu produtu ne’e husi Timor oan, malae, embaixada, no turista sira.

Portantu, Diretora Ezekutivu Loja no Kafé Aroma Timor, Junko ITO hateten, objetivu harii loja no kafé ne’e, atu introdús produtu lokál husi Timor laran tomak, tenke kualidade, sabor ba konsumidor sira iha Dili, la’ós estranjeiru de’it maibé maluk Timor oan sira hotu.

“Iha ne’e ami prepara produtu barak, hanesan kafé, cha no dosi ne’ebé halo uza produtu lokál husi grupu feto sira iha munisípiu 6, hanesan Aileu, Ainaru, Bobonaru, Baukau, Likisá no Kovalima. Fatin ida ne’e ema koñese vizita depois sosa produtu ne’ebé feitu ona hetan inspirasaun atu uza produtu lokál ba hahán loron-loron,” nia hatete.

Nia salienta, traballadór hamutuk na’in neen (6), maibé fahe ida sai hanesan manager, na’in tolu barista, na’in rua fasilitador atu halo dosi traballadór sira ne’e la’ós husi nasaun maibé Timor oan sira mak servisu iha ne’e.

Agora daudaun, nia dehan, planu ona atu halo promosaun liu husi mídia sosiál, hanesan facebook, instagram, website Aroma Timor, atu nune’e ema hotu asesu ba produtu ne’e mak halo ona para sira hakat mai atu sosa. (mj7)

No More Posts Available.

No more pages to load.