Inaugura Gruta Mãe da Graça, Don Virgílio Admira ho Komunidade Ailok-Laran

by -2.252 views
Foto Espesial

Jornalista Jaime Pires-MJ10 / Editór Noémio Falcão

DILI (Timor Post)— Asebispu Arkedioseze Metropolitana Dili, Don Virgílio do Carmo da Silva, offisialmente inaugura gruta Mãe da Graça, iha Ailok-laran, Bairro-Pité, Dili, Sábadu (06/11/2021).

Komunidade Ailok-Laran simu Don Vigílio ho dansa no bidu tradisionál.   To’o iha fatin, Arsebispu hakfodak tanba haree komunidade sira halo gruta ne’e furak tebes maske ho de’it kontribuisaun husi joven, ferik-katuas no hirak ne’ebé ba servisu iha rai liur.

Iha intervensaun, Don Virgílio hatete, admira tebes ho vontade no servisu maka’as komunidade Ailok-Laran liuliu komunidade iha área gruta no espesialmente ba rai nain ne’ebé oferese fatin ne’e ba harii obra relijiozu.

“Ha’u enkoraja nafatin liu-liu ba iha foinsa’e sira, ita bele dehan ida ne’e sai modelu servisu hamutuk fó liman ba malu,” Don Virgílio hatete.

Espíritu Timoroan nian lolo liman ba malu labele mate tanba osan. Ikus ne’e dalaruma foer iha uma oin mos uma nain la preokupa hein osan maka foin halo servisu pior liu maka ema seluk maka ba hamoos.

Arsebispu dehan, atu hametin espíritu servisu hamutuk depende mos ba lideransa lokal, inan-aman, motivador sira atu anima joven sira no promove espíritu servisu hamutuk, rona malu, hakraik-an ba malu.

“Atu realiza obra boot ida ne’e sem dúvida ita boot sira tenke rona malu, dalaruma diskuti malu ida ne’e dehan ida ne’e mak di’ak liu, ida ne’ebá mak di’ak liu, diskuti malu di’ak ida ne’e ba ita nia komunidade,” Don Virgílio hatutan.

Don Virgílio dehan, bainhira simu konvite atu halo inaugurasaun ba gruta ne’e hanoin katak obra kiik ida. “Maibé ohin ha’u haree hakfodak,” Don Virgílio hatete.

Gruta Mãe da Graça konstroi durante tinan 11 ho osan kontribuisaun hamutuk rihun $15.

No More Posts Available.

No more pages to load.