IKS Vikeke Sei Estabelese Estrutura Hodi Koopera Ho Governu

by -345 views

Timor Post (23/08/2020)- Koordenadór Arte Marsiál Ikatan Kera Sakti (IKS) Munisípiu Vikeke iha Dili, Manuel Aparício Guterres hatete, planu IKS atu estabelese estrutura iha munisípiu hodi servisu hamutuk ho governu.

“Ha’u nu’udar koordenadór jerál IKS munisípiu Vikeke iha Dili nia, ami atu ba hametin estrutura iha munisípiu ne’ebá hodi ami koordena ho estadu”, dehan Koordenadór IKS Munisípiu Vikeke iha Dili ba Timor Post iha Balidi, Domingo (23/08).

Guterres rekoñese IKS ho organizasaun KORK no PSHT mak organizasaun ne’ebé governu taka, maibé foin daudauk Primeiru Ministru Taur Matan Ruak, deside oinsá atu loke fila fali arte marsiál.

Tuir nia katak ho desizaun ne’e loke dalan ba organizasaunatu servisu hamutuk ho estadu.

“Hanesan arte marsiál nia ema hakarak konvoka ho estadu hakarak la’o tuir regra ne’ebé mak estadu fó sai ba arte marsiál liu hosi KRAM (Komisaun Regula Arte Marsiál)” .

Manuel mós hato’o ba governu katak problema mosu iha fatin-fatin labele duun ba arte marsiál exetu utiliza atributu arte marsiál nian.

“Kuandu ema uza atributu mak halo problema entaun dehan arte marsiál maibé ema uza sivíl ne’e problema indivíduu, ne’ebé labele interpreta sala katak arte marsiál mak halo problema”, afirma Aparício.

Koordenadór ne’e reforsa objetivu atu hametin sira nia estrutura iha munisípiu Vikeke hodi bele fasil deteta sira nia membru sira.

“Hosi ida ne’e mak ami hakarak kontrola ami nia ema, no bele koñese ami nia ema iha fatin ne’ebé no problema iha ne’ebé ami hatene. Agora ne’e difisil tanba, laiha direitu atu ba prevene indivíduu seluk halo problema, maibé kuandu hametin tiha sira nia estrutura sei servisu ho governu hodi prosesu nia membru sira tuir lei ne’ebé vigor iha Timor-Leste karik halo problema”, subliña.

Iha okaziaun nia husu IKS Timor-Leste tomak atu evita-aan atu monu problema hodi fó dalan ba dezenvolvimentu iha Timor-Leste.(Jornalista: Jaime Pires)

No More Posts Available.

No more pages to load.